АНУ-ын баруун хэсгийг 9 дугаар сарын 11-нд дайрсан хүчтэй шуурганы улмаас Индиана мужийн олон зам усанд автаж, үерийн усанд автсан иргэдийг аврах ажиллагаа үргэлжилж байна. Аадар бороо, хүчтэй салхи, хар салхи зэрэг үзэгдэл тус улсынхэд хэдэн мужид их хэмжээний хохирол учруулжээ.

Индиана мужийн зарим хэсэгт хүчтэй аадар бороо орсны дараа гэнэт үер бууж, замууд усанд автан, машины хөдөлгөөнд саад болсон байна. Индианаполис орчимд зарим зам эвдэрч, бүр цаашлаад замын хэсэг цөмөрч нүх үүсжээ. Замын хөдөлгөөнд оролцож явсан олон машин усанд автан, зарим нь үерт урссан байна.

Шуурганы үеэр Индиана мужид салхины хурд 160 км/цаг орчимд хүрсэн байна. Хүчтэй салхи мод, цахилгааны шон, утсыг унагаж, олон зуун мянган айл өрх, бизнесийг цахилгаангүй болгожээ. “Ройтерс” агентлагийн мэдээлснээр 8-р сарын 12-нд Индиана мужид 234 мянга гаруй хэрэглэгч цахилгаангүй байсан нь тус мужийн нийт хэрэглэгчдийн ойролцоогоор 7 хувьтай тэнцэж байв.

Шуурганы улмаас Индиана мужид 2 хүн амиа алдсан байна. Тэдний нэг нь Женнингс мужид гэр дээр нь мод унасны улмаас амиа алдсан 4 настай хүү байжээ. Мөн Портаж хотод нэг хүн амиа алдсан аж. Тэдний байшин дэлбэрсэн нь цаг агаарын нөхцөлтэй холбоотой эсэхийг холбогдох алба шалгаж байна.

Хүчтэй шуурганы систем Индианагаас гадна Иллинойс, Огайо, Кентукки, Баруун Виржини мужид нөлөөлж, хэд хэдэн торнадо үүсгэн, олон зуун мянган хэрэглэгчийг цахилгаангүй болгосон байна. Зарим бүс нутагт үерийн усанд автсан иргэдийг завь болон бусад техникээр аврах ажиллагаа явуулжээ.

Цаг уурын байгууллагууд шуурганы дараа ч гэнэтийн үер, хүчтэй аадар бороо, салхины аюул үргэлжилж болзошгүйг анхааруулсан байна.