Чилийн хойд хэсэгт усархаг аадар орсны улмаас үер бууж, шавар, нуранги үүсээд байна. Үүнтэй холбоотойгоор тус улс гамшгийн хохирлыг арилгах, сэргээн босгох ажилд арми болон аврах албаныхныг дайчилжээ. Онцгой байдлын байгууллагын мэдээллээр 1100 гаруй хүн түр хоргодох байранд байрлаж, олон зуун айл орон гэргүй болоод байна.
Ялангуяа Антофагаста мужийн Токопилья, Талтал болон Антофагаста хотын зарим хэсэг үерт өртжээ. Энэ бүс нутаг Дэлхийн хамгийн хуурай газрын нэг болох Атакамагийн цөлтэй залгаа тул ийм хэмжээний хур тунадас орох нь ховор. Гэвч богино хугацаанд их хэмжээний ус орсноор уулын хажуугийн хуурай сайрууд усаар дүүрч, шавар, чулуу, хог хаягдал хот суурин руу урсан оржээ.
Чилийн арми аврах болон цэвэрлэгээний ажиллагаанд техник, хүн хүчээ дайчилж, зам хаасан шавар, чулуу, хог хаягдлыг зайлуулах, тусгаарлагдсан иргэдэд хүрэх, түр хоргодох байрны ажиллагаанд дэмжлэг үзүүлж байна. Тус улсын арми өмнө нь ч ийм цаг агаарын гамшгийн үед хүнд даацын техник, аврах анги, нисдэг тэрэг болон эмнэлгийн багийг ашиглан тусламж үзүүлж байсан. Тухайлбал, долдугаар сард хүчтэй борооны үеэр Кокюмбо мужид армийн нисдэг тэрэг 20 гаруй хүнийг тусгаарлагдсан бүсээс нүүлгэн шилжүүлж байв.
Чилийн Үндэсний гамшгаас урьдчилан сэргийлэх, хариу арга хэмжээний албаны 8 дугаар сарын 19-ний мэдээллээр хойд нутгийн цаг агаарын гамшгийн улмаас 580 хүн гамшигт нэрвэгджээ. 1166 хүн түр хоргодох байранд байрлаж, 22 хүн тусгаарлагдсан байдалтай байна.
Мөн 182 байшин их хэмжээний, 892 байшин бага хэмжээний эвдэрсэн гэж бүртгэгдсэн байна. 68 барилгын хохирлыг одоогоор үнэлж байгаа тул хохирлын хэмжээ цаашид нэмэгдэх боломжтой байна. Нэг хүн амиа алдаж, гурван хүн гэмтсэн талаар мэдээлжээ.
Чилийн эрх баригчид Токопилья, Талтал болон Антофагаста хотын хойд хэсгийг хамгийн эрсдэлтэй бүсүүдийн тоонд оруулжээ. Тус бүсэд уулын жалга, сайрууд идэвхжих эрсдэлтэй байгаа тул иргэдийг сэрэмжтэй байхыг анхааруулсан байна.
Антофагаста мужид 19 жалгыг хяналтад авч, тэдгээрийн дундаас хүн ам суурьшсан хэсэгт ойр байрлах гурван жалгад онцгой анхаарал хандуулж байна. Шаардлагатай тохиолдолд иргэдэд яаралтай сэрэмжлүүлэх мессеж илгээж, нүүлгэн шилжүүлэхээр төлөвлөжээ.
Атакамагийн цөл орчимд хур тунадас маш бага байдаг ч өвлийн улиралд хүчтэй хүйтэн агаарын урсгал хойд Чилийн эрэгт хүрэх үед богино хугацаанд их хэмжээний бороо орох боломжтой. Ийм үед эгц уулын бэл, хуурай сайруудын дагуу ус, шавар, чулуу асар хурдтай урсаж, хот сууринд их хэмжээний хохирол учруулах эрсдэлтэй байдаг.
Чилийн эрх баригчид одоо аврах ажиллагаанаас гадна зам, дэд бүтцийг сэргээх, шавар нурангийг цэвэрлэх, тусгаарлагдсан иргэдэд тусламж хүргэх ажлыг эрчимжүүлж байна. Цаашид дахин хүчтэй бороо орвол шинэ үер, шаврын урсгал үүсэх эрсдэлтэй хэвээр байгаа тул онцгой байдлын байгууллагууд бэлэн байдлаа хадгалж байна гэж “Ройтерс” агентлаг мэдээллээ.