АНУ-ын Невада мужийн Рино хотын ойролцоо дэгдсэн хээрийн түймэр хүчтэй салхины улмаас богино хугацаанд эрчимтэй тархаж, олон мянган оршин суугчийг нүүлгэн шилжүүлэхэд хүргээд байна. Түймэр наймдугаар сарын 22-нд Рино хотын баруун хойд хэсэгт орших Сомэрсетт орчимд анх гарчээ. Уг түймэр хэдхэн цагийн дотор хэдэн мянган акр газрыг хамарч, наймдугаар сарын 23-ны байдлаар 13 мянга гаруй акр буюу 5,200 орчим га талбайг шатаасан байна. Зарим мэдээллээр түймрийн хамарсан талбай 15 мянган акр давжээ.
Гал хүчтэй, чиглэлээ байнга өөрчилж буй салхи, хуурайшилт, бага чийгшилтэй цаг агаарын нөхцөлд маш хурдтай тархаж байгаа аж. Гал түймрийн улмаас Рино хотын захын орон сууцны бүсүүдэд шууд аюул учирч, зарим барилга байгууламж шатсан байна. Орон нутгийн эрх баригчид ойролцоогоор 42 мянган хүнд нэн даруй нүүлгэн шилжих захирамж гаргаж, дахин 45 мянга орчим хүнийг шаардлагатай тохиолдолд нүүхэд бэлэн байхыг анхааруулжээ. Ингэснээр нийтдээ 90 мянга орчим хүн түймрийн нөлөөллийн бүсэд орсон байна.
Түймэртэй тэмцэх ажиллагаанд 800-1000 орчим гал сөнөөгч болон бусад аврагч оролцож, нисдэг тэрэг зэрэг агаарын техник ашиглаж байна. Невада мужийн захирагч Жо Ломбардо Вашо мужид онц байдал зарлаж, Үндэсний гвардыг дайчлан, гал түймэртэй тэмцэх болон нүүлгэн шилжүүлсэн бүсүүдийн аюулгүй байдлыг хангахад дэмжлэг үзүүлж байна.
Түймрийн улмаас гурван энгийн иргэн, гурван гал сөнөөгч буюу нийт зургаан хүн гэмтэж, мөн бараг 10 мянган айл өрх, аж ахуйн нэгж цахилгаангүй болсон байна. АНУ-ын 395-р хурдны замын зарим хэсгийг хааж, замын хөдөлгөөнд хязгаарлалт тогтоожээ. Эрх баригчдын урьдчилсан мэдээллээр түймэр хүний үйл ажиллагаанаас үүдэлтэй боловч яг ямар шалтгаанаар гал гарсныг одоогоор тогтоогоогүй, мөрдөн шалгах ажиллагаа үргэлжилж байна.
Энэ түймэр одоогоор бүрэн хяналтад ороогүй байгаа аж. Салхины чиглэл, хурд байнга өөрчлөгдөж байгаа нь гал сөнөөгчдийн ажиллагааг хүндрүүлж байна. Орон нутгийн албаныхан нүүлгэн шилжүүлэх бүсэд байгаа иргэдийг тушаалыг хүлээлгүй, аюулгүй байдлаа нэн тэргүүнд тавихыг анхааруулжээ.
Эх сурвалж: Reuters, Associated Press, Nevada Governor’s Office.