Гвиней улсын нийслэл Конакри хотод хүчтэй аадар борооны улмаас асар их хэмжээний хог нурж, ойролцоох орон сууц, түр сууцнуудыг даржээ. Үүний улмаас 30 хүн амиа алдаж, 22 хүн гэмтсэн тухай “Ройтерс” агентлаг мэдээллээ.
Конакри хотын Гбессиа дүүргийн Дар-эс-Салам орчимд тус улсын хамгийн том, задгай хогны цэг байдаг аж. Тэнд үүсгэсэн асар том овоолго нурж, хөрс гулгасан байна. Гамшиг 8 дугаар сарын 23-ны өглөөний 02:00 цагийн орчимд болжээ. Шөнийн турш үргэлжилсэн хүчтэй аадар бороо хогон овоолгыг нурахад голлон нөлөөлсөн гэж эрх баригчид мэдээлжээ.
Хогны цэгийн асар их масс ойролцоох майхан, түр сууц, байшингуудыг бүхэлд нь дарсан байна. Гэрчүүдийн мэдээлснээр нуранги маш том байсан тул орон сууцны барилга хүртэл хогонд дарагдсан аж. Аврагчид экскаватор, бусад хүнд техник ашиглан, нурангийг цэвэрлэж, дарагдсан хүмүүсийг эрэн хайж байна.
Тус улсын Засгийн газрын мэдээлснээр 30 хүн амиа алдаж, 6 хүн хүнд, 16 хүн хөнгөн гэмтсэн байна. Эрэн хайх, аврах ажиллагаа үргэлжилж байгаа тул хохирогчдын тоо нэмэгдэх эрсдэлтэй гэж мэдээллүүдэд дурджээ.
Хамгийн анхаарал татсан зүйл нь уг хогийн цэгийг эрх баригчид аюултай гэж үзэн хаахаар төлөвлөж байсан явдал юм. Орон нутгийн албаныхны мэдээлснээр Дар-эс-Саламын хогны цэгийг осол гарах өдөр буюу 8 дугаар сарын 23-нд хаахаар төлөвлөж, хогийг өөр газар шилжүүлэхээр бэлтгэж байжээ. Ойролцоох оршин суугчдад нүүхийг өмнө нь анхааруулсан ч олон хүн нүүлгүй, тухайн газарт үлдсэн байна.
Гвинейн Ерөнхий сайд Амаду Ури Бах ослын газарт очиж, аврах ажиллагааг газар дээр нь удирдан зохион байгуулж буй албаныхантай уулзжээ. Засгийн газар аврах ажиллагаанд шаардлагатай техник, хүний нөөцийг дайчилж, үлдсэн оршин суугчдыг аюулгүй газар нүүлгэн шилжүүлэхээр ажиллаж байна.
Энэ нь Гвинейд хог хаягдлын менежмент, хот төлөвлөлт, ядуу иргэдийн аюултай бүсэд амьдрах нөхцөлтэй холбоотой асуудлыг дахин хурцаар хөндлөө. Тус улс боксит, төмрийн хүдэр зэрэг байгалийн баялгаар арвин боловч хүн амын тодорхой хэсэг нь дэд бүтэц, орон сууц, нийтийн үйлчилгээний хомсдолтой тулгарсаар байна.
2017 онд мөн Дар-эс-Саламын хогны цэгт үүнтэй төстэй осол гарч, 9 хүн амиа алдаж байв. Энэ удаагийн гамшгийн эрсдэлийг эрх баригчид урьдчилан тооцсон ч сэргийлж амжсангүй гэж “Associated Press” агентлаг мэдээллээ.