“Нарра” хар салхи Вьетнамын хойд нутгийг дайран өнгөрөхдөө аадар бороо, хүчтэй салхи авчирч, үер, хөрсний гулгалт үүсгэн, нэг хүний аминд хүрчээ. Байгалийн гамшгийн улмаас 4300 гаруй өрхийг аюулгүй бүсэд нүүлгэн шилжүүлсэн байна.

Энэ нь энэ онд Өмнөд Хятадын тэнгист үүссэн Вьетнамд хүрсэн дөрөв дэх шуурга болж байна. Шуурга 8 дугаар сарын 22-нд Куангнинь, Хайфон хотын орчимд ойртож, салхины хурд төвдөө цагт 62-74 км, ширүүн салхины хурд 100 км орчимд хүрчээ. Шуурганы хурд харьцангуй удаан байгаа нь бороо хэдэн өдөр үргэлжлэх нөхцөл бүрдүүлсэн байна.

Хойд нутгийн олон газарт гол мөрний усны түвшин нэмэгдэж, зам харилцаа тасарч, нам дор газар болон уулын бүсэд үер, хөрсний гулгалтын эрсдэл нэмэгджээ. Бакнинь мужийн Сон Дон коммуны зарим суурингаас айлуудыг нүүлгэн шилжүүлж, усанд автсан замууд дээр хяналтын цэг байгуулсан байна. Мөн хэд хэдэн тосгон түр хугацаанд бусад бүсээс тусгаарлагджээ.

Цаг уурын байгууллагын мэдээлснээр Бакниньд тариалангийн 454 га талбай усанд автав. Зарим голын усны түвшин ойрын өдрүүдэд дахин 2-5 метрээр нэмэгдэх төлөвтэй. Иймээс эрх баригчид гол мөрөн, нам дор газар, хөрсний гулгалтад өртөмтгий уулын бүсийн иргэдийг онцгой анхаарал болгоомжтой байхыг анхааруулсан байна.

Куангнинь, Хайфон хотын эрх баригчид эрсдэлтэй бүсийн иргэдийг нүүлгэн шилжүүлэх, загас агнуурын завь, усан дээрх аж ахуйн байгууламжуудыг аюулгүй газарт шилжүүлэх арга хэмжээ авчээ. Хайфон хотод 1600 гаруй завь, 4400 орчим ажилтан аюулгүй зогсоолд байрласан байна.

Вьетнамын Ерөнхий сайд гамшгийн эрсдэлтэй бүсээс иргэдийг нэн даруй нүүлгэн шилжүүлэх, үер, хөрсний гулгалтын нөхцөл байдлыг тасралтгүй хянах, зам харилцаа тасарсан газруудад аврах ажиллагааг шуурхай зохион байгуулах үүрэг өгчээ.“Нарра” хар салхины хурд удаан байгаа нь Вьетнамын хойд хэсэгт хүчтэй салхинаас илүүтэй удаан үргэлжлэх аадар бороо, үерийн эрсдэлийг нэмэгдүүлж байна. Мөн хөрсний гулгалт үүсэх аюул өндөр байгаа тул аврах хүчнийхэн эрсдэлтэй бүсүүдэд 24 цагийн бэлэн байдалд ажиллаж байна гэж “Ройтерс” агентлаг мэдээллээ.