Болив улсын баруун хэсэгт 8 дугаар сарын 24-нд их хэмжээний цас орлоо. Нийслэл Ла-Пас болон ойролцоох Эль-Альто хотын зам тээврийн хөдөлгөөн үүний улмаас саатав. Цас, үзэгдэх орчин муудсантай холбоотойгоор нислэгийн хуваарийг өөрчилж, зарим авто замыг түр хаасан байна.

Цас орсон бүсэд хурдны зам, хот хоорондын замын хөдөлгөөн хүндрэн, зарим чиглэлд зорчих хөдөлгөөнийг аюулгүй байдлын үүднээс түр зогсоожээ. Боливийн эрх баригчид өмнө нь мөн дөрвөн мужид цас ихээр орсны улмаас осол аваараас урьдчилан сэргийлэх зорилгоор зарим замыг хааж, тээврийн хөдөлгөөнд хязгаарлалт тогтоож байсан юм.

Эль-Альто нисэх буудлын үйл ажиллагаа саатжээ

Ла-Пасын ойролцоох Эль-Альто олон улсын нисэх буудалд цас болон үзэгдэх орчин эрс муудсан тул онгоц хөөрөх, буухыг түр хугацаагаар зогсоосон байна. Үүний улмаас олон арван нислэг саатах, цуцлагдах нөхцөл үүсэв. Зорчигчдод нислэгийнхээ талаарх мэдээллийг агаарын тээврийн компаниудаас дахин шалгахыг зөвлөжээ.

Цаг агаар сайжирч, үзэгдэх орчин хэвийн болсны дараа нисэх буудлын үйл ажиллагааг сэргээсэн байна. Гэсэн хэдий ч өндөрлөг газар орших тус бүсэд цас, мөс замын хөдөлгөөнд үргэлжлүүлэн хүндрэл учруулж болзошгүйг анхааруулжээ.

Цасны хэмжээ ердийн бус хэмжээнд хүрчээ

Андын өндөрлөг хэсэгт энэ сарын дунд үеэс цас орж эхэлсэн байна. 8 дугаар сарын 18-нд тус улсын дор хаяж дөрвөн бүс нутагт цас орсны улмаас замын хөдөлгөөнийг түр зогсоож, зарим чиглэлд хязгаарлалт тогтоож байв.

Улирлын хувьд Боливд өвөл болж буй ч сүүлийн өдрүүдэд цас зарим газарт ердийнхөөс эрчимтэй орж байгаа аж. Өндөр уулын бүсүүдэд зам цасанд дарагдаж, машин зорчиход хүндрэлтэй болсон байна. “Ройтерс” агентлагийн мэдээлснээр, Ла-Пас болон Эль-Альто хот орчимд цас орсны улмаас авто зам, шатахууны нийлүүлэлт болон нислэгийн хуваарь зэрэг олон салбарт нөлөөлжээ.