Испани улсын “Вуэльта а Эспанья” дугуйн олон өдрийн уралдааны 3 дахь гараа Францын Пиренейн нуруунд болж байсан ч гэнэт хүчтэй мөндөр орсны улмаас барианд 15 км хүрэхгүй зай үлдээд байхад цуцаллаа. 174 км үргэлжлэхээр төлөвлөсөн тус гараа Грюиссан хотоос Фонт-Ромё руу чиглэж байв. Тамирчид Кол-де-Мон-Луи уулын өгсүүр хэсэгт явж байх үед цаг агаар огцом мууджээ.
Тухайн үед зам дээгүүр хар үүл бүрхэж, аадар бороо, хүчтэй салхи, том хэмжээний мөндөр зэрэгцэн орсон байна. Мөндөр замыг богино хугацаанд мөсөн бүрхүүлтэй мэт болгож, дугуйчдыг ноцтой эрсдэлд оруулжээ.
Тамирчид зочид буудалд хоргоджээ
Гарааг зогсоох шийдвэр гарах үед Матс Вензел, Лоренцо Фортунато нар үндсэн хэсгээс 25 секундийн өмнө явж байжээ. Харин уралдааны тэргүүлэгч, Словенийн алдарт дугуйчин Тадей Погачар нөхцөл байдал аюултай болсныг анзаарч, үндсэн хэсгийн тамирчдад замаас гарч хоргодох дохио өгсөн байна.
Тамирчид дугуйгаа орхин ойролцоох зочид буудал руу гүйж, мөндөр, борооноос түр хоргоджээ. Уралдаан зохион байгуулагчид “Гарааг үргэлжлүүлэх боломжгүй” гэж үзэн, үлдсэн замыг дуусгалгүй, тэр хэсгийг бүрэн цуцалсан байна.
Тиймээс энэ гараанд ялагч тодруулсангүй. Дугуйчдын уралдааны хугацааг ч бүртгээгүй байна. Өөрөөр хэлбэл, гуравдугаар гарааны үр дүн ерөнхий ангилалд нөлөөлөхгүй.
Погачар тэргүүлсэн хэвээр
3 дахь гараа цуцлагдсан ч Тадей Погачар ерөнхий ангиллын тэргүүлэгчийн улаан өмсгөлөө хадгалж үлджээ. Тэр Бельгийн Ваут ван Арт-аас 9 секундийн, Их Британийн Мэтт Бреннан-аас 10 секундын давуу байдалтай хэвээр байна. Погачар “Вуэльта”-г анх удаа түрүүлснээр “Их тойрог” уралдааны 3 дахь цомоо авах зорилготой байгаа юм.
Дараагийн гараа Андоррад
Уралдаан 8 дугаар сарын 25-нд Андорра-ла-Велья хотод үргэлжилнэ. 4 дэх гараанд 104.8 км туулна. Энэ замд нэгдүгээр зэрэглэлийн 3 өгсүүр багтсан тул уулын тамирчдын хувьд чухал сорилт болох юм.
Ийнхүү зуны улиралд болсон гэнэтийн хүчтэй мөндөр “Вуэльта”-гийн нэгэн гарааг бүрэн зогсоож, үзэгчид барианд тамирчдыг хүлээж байсан ч уралдааныг дуусгалгүй өндөрлүүлэхэд хүргэлээ. Пиренейн уулсын цаг агаар богино хугацаанд хэр зэрэг огцом өөрчлөгдөж болохыг энэ үйл явдал дахин харууллаа.