“Нарра” хар салхины авчирсан аадар борооны улмаас БНХАУ-ын өмнөд хэсгийн Гуанси-Жуан өөртөө засах оронд хүчтэй үер бууж, оршин суугчид өдөр тутмын амьдралдаа ноцтой хүндрэлтэй тулгарч байна. Үерийн нөхцөл байдлыг тухайн бүс нутагт байсан иргэд гар утсаараа дүрсжүүлжээ. Зам талбай бүхэлдээ бор усанд автсан нь тэдний бичлэгээс харагдана. “Reuters”-ийн мэдээлснээр, аврагчид завь ашиглан усанд автсан хорооллуудаас иргэдийг нүүлгэн шилжүүлсэн байна.

Зам талбай бүхэлдээ усанд автжээ

Гуанси мужийн Чунцзо хот болон Нинминь шяньд хэд хоног үргэлжилсэн ширүүн борооны улмаас гол, суваг шуудууны усны түвшин эрс нэмэгдсэн байна. Иргэдийн гар утсаараа хийсэн бичлэгт гудамж талбай бор хүрэн өнгийн үерийн усанд автаж, автомашинууд зорчих боломжгүй болсон дүр зураг харагджээ.

Зарим газарт аврагчид өвдөг хүрсэн ус туулан явж, резинэн завиар айлуудад хүрч, үерт боогдсон иргэдийг аюулгүй газарт гаргасан байна. Мөн хэд хэдэн нам дор газар усанд бүрэн автжээ.

54 мянган хүнийг нүүлгэн шилжүүлэв

Хятадын төрийн телевиз CCTV-ийн мэдээлснээр, Гуанси мужид үерийн улмаас ойролцоогоор 54 мянган хүнийг нүүлгэн шилжүүлсэн байна. Тэдний 8,087-г нь түр хамгаалах байранд байрлуулжээ. Мөн 15 голын сав газрын 20 хэмжилтийн цэгт усны түвшин аюулын хэмжээнд хүрсэн байна.

Нинминь уулын хэмжээнд үерийн аюулын үед авах арга хэмжээний хамгийн өндөр түвшний нэг болох I түвшний онцгой хариу арга хэмжээ авч, аврагчид айл бүрээр орж, ялангуяа өндөр настнуудыг түр хамгаалах байранд хүргэжээ. Тус бүс нутагт 16 мянга гаруй хүнийг аюулгүй нүүлгэн шилжүүлсэн бөгөөд орон нутгийн эрх баригчдын мэдээлснээр одоогоор хүн амь үрэгдсэн болон сураггүй болсон тохиолдол бүртгэгдээгүй байна.

Зам, холбоо, цахилгаан тасалдаж байна

Үерийн ус болон хөрсний гулгалтын улмаас Нинминь ууланд 30 гол замын хэсэг усанд автаж, эсвэл хаагдсан байна. Зарим алслагдсан сууринд үүрэн болон суурин холбоо тасарч, онцгой байдлын албаныхан хиймэл дагуулын холбоо ашиглан мэдээлэл дамжуулж байгаа аж.

Үер зөвхөн зам тээвэрт бус, ус, цахилгаан, харилцаа холбооны үйлчилгээнд ч доголдол үүсгэжээ.

Хар салхи далайд саатсанаар бороо үргэлжилж байна

“Нарра” хэд хоногийн турш Бэйбу булан буюу Тонкины буланд саатсан нь өмнөд Хятадад удаан хугацаанд хүчтэй бороо орох нөхцөл бүрдүүлжээ. Үүний улмаас Гуансигаас гадна Гуандун, Хайнань зэрэг бүс нутагт ч аадар бороо үргэлжилж байна.

Цаг уурын байгууллагуудын мэдээлснээр, өмнөд Хятадын зарим хэсэгт бороо 8 дугаар сарын 27 хүртэл үргэлжилж болзошгүй аж. Үер, хөрс гулгах эрсдэл өндөр хэвээр байна.

“Нарра” сансрын хөтөлбөрт ч нөлөөлжээ

Хар салхины нөлөө Хятадын сансрын хөтөлбөрт хүртэл хүрсэн байна. Хайнань мужийн Вэньчан Сансрын төвөөс хөөргөхөөр төлөвлөж байсан “Чанъэ-7” автомат станцыг Сар луу хөөргөх ажиллагааг цаг агаарын нөхцөлөөс шалтгаалан хойшлуулжээ.

Ийнхүү “Нарра” хар салхи Өмнөд Хятадад үер, хөрсний гулгалт үүсгэж, олон арван мянган хүнийг нүүлгэн шилжүүлэхэд хүргээд зогсохгүй зам тээвэр, дэд бүтэц болон сансрын хөтөлбөрийн үйл ажиллагаанд хүртэл нөлөөлж байна.