Хятадын Бээжин хотод болж буй Дэлхийн хүн дүрст роботын II наадамд оролцож буй хүн дүрст роботууд ширээний теннисээр өрсөлдөж, хиймэл оюун болон роботын технологийн шинэ боломжуудыг олон нийтэд харууллаа. Ширээний теннис тоглох үедээ роботууд хөдөлж буй бөмбөгийг мэдрэгчээрээ хянаж, ракет барьсан гараа тохируулан цохихыг оролдож байв. Теннис тоглоход бөмбөгний хурд, чиглэл, эргэлтийг тооцож, дараагийн хөдөлгөөнөө богино хугацаанд төлөвлөх шаардлагатай байдаг. Энэ нь хүн дүрст роботын хувьд өндөр сорилт болдог.
“Reuters”-ийн мэдээлснээр тэмцээн Бээжингийн Үндэсний хурдны тэшүүрийн ордонд 8 дугаар сарын 23-нд болов. Энэ жилийн Дэлхийн хүн дүрст роботын наадамд 666 багийн 2000 гаруй робот оролцож, нийт 51 төрлийн тэмцээн, сорилтод өрсөлдөж байна. Спортын төрөлд гүйлт, харайлт, хөлбөмбөг, бокс, ширээний теннис зэрэг багтжээ.
Үүнээс гадна роботыг үйлдвэр, ресторан, оффис зэрэг бодит орчинд ажиллуулах чадварыг шалгах практик даалгаврууд өгч байгаа юм. Энэ нь роботыг зөвхөн хурдан гүйж, хөдөлгөөн хийх чадвартай эсэхээр нь бус, хүний өдөр тутмын болон үйлдвэрлэлийн орчинд бие даан ажиллаж чадах эсэхийг шалгах зорилготой болж байгааг харуулж байна.
Роботууд хүний рекордыг давжээ
Наадмын үеэр Хятадын хүн дүрст роботууд спортын үзүүлэлтээрээ олны анхаарлыг татсан байна. Бээжингийн Хүн дүрст роботын инновацын төвийн бүтээсэн “Тяньгун Ультра” робот 100 метрийн зайг 8.86 секундэд туулж, хүн төрөлхтний 100 метрт тогтоосон Дэлхийн дээд амжилт болох Ямайкийн Усэйн Болтын 9.58 секундийн амжилтыг давжээ. Энэ нь ердөө хэдхэн хоногийн өмнө тогтоосон роботын 9.39 секундийн дээд амжилтыг мөн шинэчилсэн үзүүлэлт болсон байна.
Гэхдээ роботуудын хурд нэмэгдэхийн хэрээр тэднийг зогсоох, тэнцвэрээ хадгалах асуудал тулгарч байна. Зарим робот барианд орсныхоо дараа унаж, хамгаалалтын дэвсгэр мөргөсөн талаар “Reuters” мэдээлжээ.
Хятадын роботын салбарын томоохон үзүүлбэр
Дэлхийн хүн дүрст роботын наадам нь Хятад улс робот, хиймэл оюуны салбарт гаргаж буй ахиц дэвшлээ харуулах томоохон арга хэмжээ болж байна. “Reuters”-ийн дүгнэснээр тус улс хүн дүрст роботыг судалгааны лабораториос гаргаж, үйлдвэрлэл, ложистик, үйлчилгээ зэрэг бодит салбарт ашиглахыг эрчимтэй зорьж байгаа юм.
Ширээний теннис зэрэг нарийн хөдөлгөөн, хурдан хариу үйлдэл шаарддаг спортод роботыг туршиж байгаа нь тэдний харах, тооцоолох, хөдөлгөөнөө зохицуулах, бодит цагт шийдвэр гаргах чадварыг шалгах нэг хэлбэр болж байна. Ийнхүү Бээжинд болж буй роботын наадам нь ирээдүйн робот технологийг үзүүлдэг үзүүлбэрээс гадна хүн дүрст машинууд бодит амьдралын нарийн төвөгтэй ажлуудыг хэр зэрэг бие даан гүйцэтгэж чадахыг шалгах туршилтын талбар болж байна.