Балбын байгалийн үзэсгэлэнт ой мод, гол мөрнөөрөө алдартай Читван дүүрэг энэ өдрүүдэд Гималайн бүс нутгийг хамарсан хүчтэй үерийн улмаас амиа алдсан, хэн болох нь тогтоогдоогүй олон зуун хүний түр оршуулгын газар болжээ. Гамшиг наймдугаар сарын 26-нд Балба, Хятадын хилийн ойролцоох Расува мужийн уулын хөндийд мөстлөгийн нуралтаас үүдэн гэнэт үер бууснаар эхэлсэн байна. Үерийн хүчтэй урсгал хүмүүсийн цогцсыг гол мөрнөөр олон зуун километр зөөвөрлөжээ.
Гамшгийн голомтоос бараг 200 километрийн зайд орших Читван дүүргийн Девгхат ойн бүсэд эрх баригчид олон зуун булш ухаж, танигдахын аргагүй болсон цогцсуудыг оршуулж эхэлсэн байна.
Өмнө нь өглөөний алхалт, амралт зугаалгын зориулалтаар иргэд олноороо зорчдог байсан ойн замууд өдгөө түр хугацааны оршуулгын газар болон хувирчээ. Хэт удаан хугацаанд усанд байж, задрал нь эрчимжсэн тул олон хүний цогцсыг таних боломжгүй болсон байна.
Читван дүүргийн Бхаратпур хотын захиргааны тэргүүн Ганеш Арьял “Бидэнд өөр сонголт үлдээгүй учраас ийм арга хэмжээ авах шаардлагатай болсон. Цогцсууд хурдан задарч, олон нийтийн эрүүл мэндэд эрсдэл учруулах вий гэсэн асуудал хамгийн их санаа зовоож байлаа” гэж мэдэгджээ.
Эрх баригчид бямба гарагт Девгхат ойн бүсэд хэн болох нь тогтоогдоогүй 96 хүний цогцсыг оршуулсан бөгөөд ням гарагт дахин 100 гаруй хүнийг оршуулахаар төлөвлөсөн байна. Энэ хооронд аврах багууд гол мөрөн болон үерийн хог хаягдал, нурангиас шинэ цогцсуудыг үргэлжлүүлэн гаргаж байгаа аж. Балбын хойд хэсэгт болсон энэхүү гамшгийн улмаас одоогийн байдлаар 750 орчим хүн амиа алдаж, 3,000 гаруй хүн сураггүй хэвээр байгаа тухай мэдээлжээ.
Хохирогчдыг таньж тогтоох ажилд аврагчид, цагдаагийн алба хаагчид болон бусад байгууллагын 100 орчим ажилтан оролцож байна. Тэд цогцсуудын зургийг авч бүртгэх, ар гэрийнхэнд нь таних ажиллагаанд туслах, оршуулгад бэлтгэх зэрэг ажлыг хийж байгаа юм.
Эрх баригчид булш бүрийн байршлыг нарийвчлан бүртгэж, газрын дээр болон доор таних тэмдэг байрлуулжээ. Мөн байршлын нарийн мэдээллийг хадгалж байгаа бөгөөд ингэснээр хожим хэн болох нь тогтоогдсон тохиолдолд цогцсыг дахин ухаж, ар гэрийнхэнд нь шилжүүлэх боломжтой аж.
Танигдаагүй бүх цогцсоос ДНХ-ийн дээж авч байгаа бөгөөд ар гэрийнхэн нь эрэн сурвалжилж буй хүмүүсийн мэдээлэл, албан ёсны бүртгэл болон генетикийн шинжилгээгээр дамжуулан хожим таньж тогтоох боломж бүрдэх юм.
Энэтхэг улс ДНХ-ийн шинжилгээ, шүүх эмнэлгийн ажилд туслахаар мэргэжлийн баг илгээсэн бөгөөд тэд Балбын мэргэжилтнүүдтэй хамтран ажиллах аж. Мөн Балбын эрх баригчид Хятадын шинжээчдийн багтай холбоо тогтоон хамтын ажиллагааны асуудлыг хэлэлцэж байна.
Энэхүү гамшиг нь Гималайн бүс нутгийн сүүлийн жилүүдэд тохиолдсон хамгийн том байгалийн гамшгуудын нэг болоод байгаа бөгөөд аврах, эрэн хайх ажиллагаа үргэлжилсээр байна.