“Манчестер Сити” клуб зуны наймааны цонх хаагдахаас өмнө “Челси”-гийн Аргентины хагас хамгаалагч Энцо Фернандесийг 125 сая фунт стерлингээр худалдан авч, Английн хөлбөмбөгийн түүхэн дэх хамгийн өндөр үнийн дүнтэй наймааг дахин давтлаа.
МАНЧЕСТЕР. /Reuters/. “Манчестер Сити” клуб есдүгээр сарын 1-нд 25 настай Аргентины шигшээ багийн хагас хамгаалагч Энцо Фернандесийг “Челси”-гээс 125 сая фунт стерлингээр буюу ойролцоогоор 169.1 сая ам.доллараар эгнээндээ нэгтгэснээ албан ёсоор зарлав.
Тус наймааны үнэ нь өнгөрсөн жил “Ливерпүүл” клуб “Ньюкасл”-аас Шведийн довтлогч Александр Исакийг авахдаа тогтоосон Британийн шилжилтийн дээд амжилттай тэнцэж байна.
Фернандес “Челси”-тэй салах ёс гүйцэтгэж буйгаа олон нийтийн сүлжээнд нийтэлснээс нэг цагийн дараа “Манчестер Сити” таван жилийн гэрээгээ баталгаажуулжээ. Наймааг шилжилтийн цонх хаагдсанаас буюу Их Британийн цагаар 23:00 цаг өнгөрснөөс хойш 30 минутын дараа зарласан байна.
“Сити”-гийн зуны их зарлага
Энцо Фернандесийн наймаа нь “Манчестер Сити”-гийн энэ зуны шилжилтийн цонхон дахь өөрийнх нь дээд амжилтыг хоёр дахь удаагаа шинэчилсэн томоохон худалдан авалт болж байна.
Клуб долдугаар сард Английн хагас хамгаалагч Эллиот Андерсоныг 116 сая фунт хүртэлх үнээр авч, өөрийн хамгийн өндөр үнэтэй наймааны дээд амжилтыг тогтоож байсан юм.
Мөн “Сити” Мароккогийн хагас хамгаалагч Айюб Буаддийг 86 сая фунтээр, Бразилын жигүүрийн тоглогч Аллан Элиасыг ойролцоогоор 40 сая еврогоор авчээ.
Шилжилтийн цонхны хаалтын өдөр “Эвертон”-ы довтлогч Илиман Ндиайег 65 сая фунтээр авч, Фернандесийн өмнөхөн хоёр дахь том наймаагаа хийсэн байна. Ингэснээр “Манчестер Сити”-гийн Пеп Гуардиолагийн дараах багийн шинэчлэлд зарцуулсан нийт хөрөнгө 450 сая фунт стерлингт хүрчээ.
Фернандесийн шинэ сорилт
Фернандес 2023 оны нэгдүгээр сард “Бенфика”-гаас “Челси”-д шилжихдээ тухайн үеийн Британийн дээд амжилт болох 106.8 сая фунт стерлингийн үнээр 8.5 жилийн гэрээ байгуулж байв.
Тэрбээр Лондоны багийн бүрэлдэхүүнд байхдаа Конференц лиг болон Клубуудын дэлхийн цомд түрүүлсэн байна.
Өнгөрсөн 2025/26 оны улиралд Фернандес “Челси”-гийн бүх тэмцээнд 15 гоол оруулж, долоон гоолын дамжуулалт өгчээ. Ингэснээр тэр багийнхаа Жоау Педрогийн дараах хоёр дахь шилдэг мэргэн бууч болсон байна.
Мөн Аргентины шигшээ багийн бүрэлдэхүүнд 2026 оны ДАШТ-д оролцож, шөвгийн 16 болон хагас шигшээ тоглолтуудад чухал гоол оруулсан ч Аргентин Испанид хожигдон мөнгөн медаль хүртсэн юм.
Фернандес карьертаа 100 сая фунт стерлингээс дээш үнээр хоёр удаа зарагдсан анхны тоглогч болж байна.
Аваргын төлөөх зорилго
“Манчестер Сити” өнгөрсөн улиралд Премьер лигт хоёрдугаар байр эзэлж, аварга “Арсенал”-аас долоон оноогоор хоцорсон.
Шинэ улирлыг хоёр дараалсан хожлоор эхлүүлсэн “Сити” энэ зуны асар их зарлагаараа Премьер лигийн аваргын цомыг “Арсенал”-аас буцаан авах зорилгоо тодорхой харуулж байна.
Үүний зэрэгцээ клуб зуны наймааны цонхоор хэд хэдэн тоглогчоо зарж, ойролцоогоор 280 сая фунт стерлингийн орлого олжээ. Тэдний дунд Савио, Родри, Нико Гонсалес, Тижжани Рейндерс, Жеймс Траффорд, Натан Аке нар багтсан бол Бернардо Силва, Жон Стоунз нар гэрээний хугацаа дууссанаар үнэгүй явсан байна.
Эх сурвалж: Reuters