Хойд Солонгосын цэргийн төлөөлөгчид Хятадын жил бүр зохион байгуулдаг аюулгүй байдлын томоохон хурал болох Сяншань форумд оролцохоор Бээжинг зорьсон талаар тус улсын төрийн хэвлэл мэдээлжээ.
Хойд Солонгосын Батлан хамгаалахын дэд сайд Ким Ган Илийн тэргүүлсэн төлөөлөгчдийг мягмар гарагт Хойд Солонгос болон Хятадын батлан хамгаалах, цэргийн албаныхан үдэж өгсөн байна. Энэ тухай төрийн мэдээллийн KCNA агентлагийн нийтэлсэн дүрс бичлэгийг “Ройтерс” бие даан баталгаажуулж чадаагүй байна.
Бээжинд зохион байгуулагдах 13 дахь Сяншань форумд дэлхийн аюулгүй байдлын асуудлаар Хятадын цэргийн удирдлагын байр суурь, зорилтыг танилцуулах төлөвтэй байна. Гурван өдөр үргэлжлэх тус арга хэмжээнд олон орны хэдэн зуун цэргийн албан хаагч, дипломатч, судлаач оролцохоор хүлээгдэж байна.
Сяншань форумыг Сингапурт болдог “Шангри-Ла яриа хэлэлцээ”-ний Хятадын хувилбар гэж үздэг бөгөөд илүү зохион байгуулалттай, албан ёсны шинжтэй арга хэмжээ юм.