Жибутигээс Йемен рүү 300 гаруй хүн тээвэрлэн явсан завь хөмөрсний улмаас наад зах нь 139 цагаач амиа алдаж, 84 орчим хүн сураггүй болжээ. Олон улсын шилжилт хөдөлгөөний байгууллага (IOM) аравдугаар сарын 11-ний ням гарагт энэ талаар мэдээлсэн байна. Амиа алдсан хүмүүсийн дунд 15 хүүхэд байжээ.
НҮБ-ын байгууллагын мэдээлснээр, завь аравдугаар сарын 8-наас 9-нд шилжих шөнө Жибутигийн Обок боомт хотын хойд хэсэгт орших Гухере орчимд хөмөрсөн байна. Аврагчид амьд үлдсэн хүмүүсийг эрэн хайж байгаа бөгөөд одоогоор олдсон хүмүүсийг тусламжид хамруулжээ.
IOM-ын Жибути дахь хариу арга хэмжээний зохицуулагч Сафия Ибрахимын мэдээлснээр, завинд эрэгтэй, эмэгтэй хүмүүс болон хүүхдүүд зорчиж байжээ. Аврах ажиллагаа орон нутгийн эрх баригчидтай хамтран үргэлжилж байгаа тул амиа алдсан хүний тоо нэмэгдэх эрсдэлтэй байна.
Цагаачид Йеменээр дамжин Персийн булангийн чинээлэг орнуудад хүрэхээр зорчиж явжээ. Гэвч Йемен өөрөө ч зэвсэгт мөргөлдөөнд нэрвэгдсэн хэвээр байгаа бөгөөд Саудын Арабаар дэмжүүлдэг засгийн газрын хүчин болон Иранаар дэмжүүлдэг хуситуудын хооронд 2022 онд НҮБ-ын зуучлалаар байгуулсан гал зогсоох тохиролцооноос хойших хамгийн ноцтой мөргөлдөөний хурцадмал байдал үүсээд байгаа аж.