АНУ-ын завсрын сонгуульд Ардчилсан нам Конгрессын хоёр танхимд олонх болсны дараа хөрөнгө оруулагчид хиймэл оюуны салбарт тавих зохицуулалт чангарч болзошгүй гэж болгоомжилж эхэлжээ. Үүний улмаас АНУ-ын Nasdaq 100 индекс 6.4 хувь, S&P 500 индекс 4.4 хувиар унаж, технологийн компаниудын зах зээлийн үнэлгээ нийт 3.2 их наяд ам.доллароор буурсан байна. Nvidia компанийн хувьцаа 9.3 хувиар унажээ. Энэ уналт Азийн технологийн зах зээлүүдэд нөлөөлж, Тайвань, Өмнөд Солонгосын хөрөнгийн биржүүдэд огцом бууралт ажиглагдав.

Тайванийн хөрөнгийн зах зээл 8.3 хувиар унаж, сүүлийн нэг жилийн хамгийн огцом уналт болов

Тайванийн хөрөнгийн зах зээлийн гол индекс TAIEX арваннэгдүгээр сарын 6-ны баасан гарагийн арилжааны эхэнд 8.3 хувиар унаж, сүүлийн нэг жил гаруйн хугацаанд тохиогоогүй огцом бууралт үзүүллээ. Үүнд АНУ-ын хөрөнгийн зах зээлд технологийн болон хиймэл оюуны салбарын хувьцаанууд эрчимтэй унасан нь голлон нөлөөлжээ.

Тайванийн хөрөнгийн бирж нээгдсэнээс хэдхэн минутын дотор TAIEX индекс 3,737.67 нэгжээр буурч, 40,000 нэгжийн босгоос доош орсон байна. Өдрийн арилжааны эхэнд индекс 37,837.05 нэгжид хүрсэн нь түүхэн дэх хамгийн их нэг өдрийн доторх нэгжийн уналт болжээ.

Тус улсын хамгийн том компаниудын нэг, дэлхийн тэргүүлэх хагас дамжуулагч үйлдвэрлэгч TSMC-ийн хувьцаа өдрийн зөвшөөрөгдөх доод хязгаарт хүрч, 2,020 тайвань доллар болж буурсан байна. Тус компани Тайванийн хөрөнгийн зах зээлийн нийт үнэлгээний 40 гаруй хувийг бүрдүүлдэг. Мөн MediaTek-ийн хувьцаа 10 хувийн уналтын хязгаарт хүрч, Foxconn компанийн хувьцаа 9 хувиас илүү буурчээ.

Энэхүү уналт зөвхөн Тайваньд бус, Азийн технологийн салбарын томоохон зах зээлүүдэд зэрэг ажиглагдав. Өмнөд Солонгосын Kospi индекс 8.8 хувиар унаж, арилжааг түр зогсоох арга хэмжээ авсан бол Японы Nikkei 225 индекс 6.6 хувиар буурсан байна.