Польшын Краков хотын төв талбайд арваннэгдүгээр сарын 7-ны бямба гарагт зэвсэгт халдлага болж, зургаан хүн амиа алдаж, 16 хүн шархаджээ. Халдлага жуулчид болон оршин суугчид олноор цуглардаг Хуучин хотын төв талбайд болсон бөгөөд хүмүүс сандарч, зугтах үеэр эмх замбараагүй байдал үүссэн байна.

Польшийн Ерөнхий сайд Доналд Туск Краков хотод бямба гарагийн орой мэдэгдэл хийхдээ халдлагыг терроризмын шинжтэй үйлдэл хэмээн тодорхойлж, “Польшид ийм хэмжээний харгис терроризмын хэрэг өмнө нь гарч байгаагүй” гэжээ. Халдлагын дараа хотын Хуучин төвийн зарим хэсгийг цагдаа нар хамгаалалтад авч, мөрдөн шалгах ажиллагаа үргэлжилж байна.

Халдлагын үеэр ойр орчимд байсан иргэд түргэн тусламж болон цагдаагийн машинуудыг харж, хүмүүсийн зугтахыг ажиглажээ. Нэг оршин суугч “Би энэ хавьд байсан. Түргэн тусламж, цагдаагийн машинууд явж байгааг харсан. Хэн нэгэн бидэнд гүй гэж хэлсэн ч яагаад гэдгийг нь мэдээгүй. Эцэст нь халдлага үйлдэгч буудуулсан газар очиж, хэдэн зураг авсан” хэмээн ярьсан байна.

Польшийн цагдаагийн мэдээлснээр, амиа алдсан хүмүүсийн нэг нь Их Британийн иргэн байжээ. Шархадсан хүмүүсийн тав нь Австри, Герман, Португал зэрэг улсын иргэд байна. Түүнчлэн талбайн ойролцоо ажиллаж байсан морин тэрэгний жолооч нар халдлагад өртжээ.

Халдлагын улмаас Краковын төв талбайд морин тэрэгний үйлчилгээ түр зогссон бөгөөд энэ нь хотын аялал жуулчлалын салбарт нөлөөлж байна.

Краковын морин тэрэгний жолооч нарын холбооны гишүүн Эрик Нецек “Манай хот төсөөлөхийн аргагүй эмгэнэлт явдалд өртлөө. Холбооны дөрвөн гишүүн шархадсанаас хоёрынх нь биеийн байдал хүнд байсан. Одоогоор амь насанд нь аюулгүй болсон гэж сонссон ч урт хугацааны эмчилгээ, нөхөн сэргээх шаардлагатай. Тэднийг хурдан эдгэрээсэй гэж хүсэж байна” хэмээн ярьжээ.

Австралиас ирсэн жуулчин Дэвид халдлага болохоос нэг цагийн өмнө талбайн хойд хэсэгт байсан бөгөөд сирен дуугарч, хүмүүс олноор цугларсны дараа хотын уур амьсгал эрс өөрчлөгдсөнийг онцолсон байна.