Мексикийн хар тамхины наймааны томоохон бүлэглэлүүдийн нэг болох Гвадалахарагийн картелийг үндэслэгч Мигель Анхель Феликс Галлардо 80 насандаа эмнэлэгт нас баржээ.
Түүнийг Мексикийн хар тамхины наймааны сүлжээг зохион байгуулж, өргөжүүлэхэд гол үүрэг гүйцэтгэсэн хүмүүсийн нэг гэж үздэг. Феликс Галлардо 1980-аад онд Гвадалахарагийн картелийн удирдагч байхдаа хар тамхины наймааны томоохон сүлжээг хянаж байв.
Түүнийг 1989 онд баривчилж, хар тамхины наймаа болон зэвсгийн хэрэгт холбогдуулан 40 жилийн хорих ял оноосон юм. Харин 2017 онд АНУ-ын Хар тамхитай тэмцэх газрын ажилтан Энрике “Кики” Камарена болон Мексикийн нисгэгч Альфредо Завала нарыг 1985 онд хулгайлан хөнөөсөн хэрэгт буруутай гэж үзэн дахин 37 жилийн ял нэмжээ. Тэрбээр уг хэрэгт оролцоогүй хэмээн буруугаа үгүйсгэсээр байсан байна.
Феликс Галлардо 1970–1980-аад онд Колумбын хар тамхины наймаачид, тэр дундаа Пабло Эскобарын Медельиний картелтэй холбоо тогтоож, кокаиныг Мексикээр дамжуулан АНУ-д нийлүүлэх томоохон сүлжээ байгуулсан гэдгээрээ алдартай. Түүнийг Мексикийн орчин үеийн хар тамхины наймааны тогтолцоог бий болгоход голлон нөлөөлсөн хүмүүсийн нэг гэж үздэг.
Тэрбээр 2026 оны арваннэгдүгээр сарын 13-нд биеийн байдал нь муудсаны улмаас Жапалиско мужийн өндөр хамгаалалттай шоронгоос Гвадалахара хотын хувийн эмнэлэгт хүргэгдсэн бөгөөд арваннэгдүгээр сарын 15-нд олон эрхтний дутагдлын улмаас нас барсныг орон нутгийн аюулгүй байдлын байгууллага мэдээлжээ.
Эх сурвалж: Reuters, Al Jazeera, La Jornada.


