Хиймэл оюуны Claude чатботыг хөгжүүлэгч АНУ-ын “Anthropic” компани арваннэгдүгээр сарын 19-ний пүрэв гарагт “Nasdaq” хөрөнгийн биржид хувьцаагаа арилжиж эхэллээ. Эхний өдөр тус компанийн хувьцааны ханш зах зээлийн үнэлгээгээр 2 ихнаяд ам.долларт хүрчээ. Ингэснээр тус компани энэ оны зургаадугаар сард хөрөнгийн зах зээлд хувьцаагаа гаргасан SpaceX компанийн амжилтыг давж, түүхэн дэх хамгийн өндөр үнэлгээтэй IPO-уудын нэгийг хийсэн байна.
Гэвч компанийн хувьцааны арилжаа эхэлсэн өдөр Сан-Франциско дахь төв байрных нь гадна хиймэл оюуны хөгжлийг эсэргүүцсэн жагсаал болжээ. Жагсагчид хиймэл оюуны хурдацтай хөгжил хүн төрөлхтний аюулгүй байдалд заналхийлж байгааг анхааруулан, технологийн хөгжлийг хязгаарлахыг шаардсан байна.
Жагсаалд “Anthropic” компанид өмнө нь судлаачаар ажиллаж байсан Жейкоб Коксон оролцжээ. Тэрбээр “Энэ технологи бидний амьдралд заналхийлж байгаа учраас бид энд ирсэн. Зөвхөн бидний амьдралд ч биш, бидний мэддэг бүх хүний, тэр байтугай хиймэл оюун гэдэг үгийг ч мэдэхгүй хүмүүсийн амьдралд аюул учруулж байна” хэмээн мэдэгдсэн байна.
Эсэргүүцэгчдийн гол санаа зовж буй асуудлын нэг нь хиймэл оюун өөрийгөө улам сайжруулах, дараагийн үеийн илүү хүчирхэг загварыг бие даан хөгжүүлэх боломж юм. Үүнийг технологийн салбарт Recursive Self-Improvement буюу өөрийгөө давтан сайжруулах үйл явц гэж нэрлэдэг. Жагсагчид ийм технологийн хөгжил хүний хяналтаас гарах эрсдэлтэй гэж үзэж, хөгжүүлэлтийг түр зогсоохыг уриалжээ.
Харин хөрөнгийн зах зээлд “Anthropic”-ийн хувьцааны эрэлт өндөр байв. Тус компани IPO-оор нийт 81 тэрбум ам.доллар татан төвлөрүүлж, нэгж хувьцааныхаа анхны үнийг 83 ам.доллароор тогтоосон байна. Арилжаа эхлэхэд хувьцааны үнэ 111.5 ам.долларт хүрч, 34 хувиар өссөнөөр компанийн зах зээлийн үнэлгээ түр хугацаанд 2 ихнаяд ам.доллар давжээ. Гэхдээ арилжааны өдрийн төгсгөлд хувьцааны үнэ 97.17 ам.доллар болж бууран, компанийн үнэлгээ 1.77 их наяд ам.доллар орчимд тогтсон байна.
2021 онд “OpenAI”-ийн 7 ажилтан үүсгэн байгуулсан “Anthropic” компани Claude нэртэй хиймэл оюуны загваруудаараа дэлхийд танигдсан юм. Тус компани хиймэл оюуны аюулгүй байдал, хариуцлагатай хөгжүүлэлтийг гол зорилгоо болгон зарладаг ч технологийн хөгжил, арилжааны ашиг сонирхлын хоорондын зөрчилтэй холбоотой шүүмжлэлтэй тулгарсаар байна.
Ийнхүү “Anthropic”-ийн хөрөнгийн зах зээл дэх түүхэн амжилт болон компанийн төв байрны гаднах эсэргүүцлийн жагсаал нэг өдөр давхацсан нь хиймэл оюуны салбарын өнөөгийн хоёр өөр дүр зургийг харууллаа. Нэг талд нь хөрөнгө оруулагчид технологийн ирээдүйд их хэмжээний хөрөнгө оруулж байгаа бол нөгөө талд нь түүний нийгэм, хүн төрөлхтөнд учруулж болзошгүй эрсдэлийн талаар болгоомжлол нэмэгдэж байна.


