Sony кино компанийн зүгээс “Хүн-Аалз 4” киноны товыг зарлалаа. Жүжигчин Том Холландын гол дүрд нь тоглож байгаа, одоогоор нэр нь тодорхой болоогүй дөрөвдүгээр анги 2026 оны 7 сарын 24-ний өдөр нээлтээ хийхээр болсныг зарласан байна. Хүн-Аалзын шинэ ангийг өөр нэгэн супербаатарын тухай “Шан Чи ба Арван бөгжний домог” киноны найруулагч Дестин Даниэл Креттон найруулахаар болжээ. Английн жүжигчин Том Холланд “Spider-Man: Homecoming” (2017),  “Spider-Man: Far From Home” (2019) болон “Spider-Man: No Way Home” (2021) хэмээх Хүн-Аалзын цуврал кинонуудад гол дүрийг бүтээж, мөн Марвелын ертөнцийн “Captain America: Civil War” (2016), “Avengers: Infinity War” (2018) “Avengers: Endgame” (2019) хэмээх гурван кинонд туслах дүрийг бүтээсэн юм. Хүн-Аалзын шинэ ангийн зураг авалт ирэх жил эхлэхээр төлөвлөгдсөн байна. Том Холланд 2025 онд мөн нэрт найруулагч Кристофер Ноланы ээлжит шинэ бүтээлд тоглохоор сонгогдсон бөгөөд тус кино Хүн-Аалзын дөрөвдүгээр ангиас нэг долоо хоногийн өмнө буюу 2026 оны 7 сарын 17-нд нээгдэх тов гарчээ.