Дэлхийн жүдо бөхийн өдөр өнөөдөр тохиож байна. Монголын жүдо бөхийн холбоо энэ өдрийг тохиолдуулан Монгол Улсын гавьяат дасгалжуулагч Ч.Машбатын нэрэмжит жүдо бөхийн дотоодын чансаа тогтоох “Sensei cup-2024” тэмцээнийг Спортын төв ордны жүдо бөхийн зааланд зохион байгуулж байна.
Нэрэмжит тэмцээний эзэн Ч.Машбат нь Монгол улсад самбо, жүдо бөхийн спортыг дэлгэрүүлэх үйлсэд үнэлж баршгүй хувь нэмэр оруулсан нэгэн юм.
Энэ жилийн тэмцээнд 46 багийн нийт 220 (эрэгтэй 132, эмэгтэй 88) тамирчин өрсөлдөж байгаа бөгөөд жин жинд шалгарсан зургаан тамирчин ирэх сард болох “Топ-6” тэмцээнд оролцох эрх авах билээ.
Өнөө жилийн тэмцээнд оролцогчдоос онцолбол, 48 кг-ын жинд “Рио-2016” олимпын наадмын хүрэл медальт Г.Отгонцэцэг, ДАШТ-ий хошой хүрэл медальт, гавьяат тамирчин Ё.Басхүү, Л.Энхрийлэн, өсвөрийн ДАШТ-ий мөнгөн медальт Т.Отгонжаргал нарын шилдгүүд байна.
Г.Отгонцэцэг нь “Токио-2020” олимпын наадмаас хойш гурван жилийн дараа дэвжээнд гарч байгаа нь энэ юм. “Sensei cup” цуврал тэмцээнийг 2020 оноос анхлан зохион байгуулж ирсэн. “Парис-2024” олимпын наадмын дараах сорил тэмцээн гэдгээрээ онцлогтой.