Өмнөд Солонгосын дуу хөгжмийн салбарын томоохон шагнал гардуулах ёслолын арга хэмжээнд тооцогддог, CJ ENM-ээс зохион байгуулдаг MAMA Awards-т оролцох хүндэт зочдын нэрсийг албан ёсоор танилцуулаад байна. Зохион байгуулагчдын зүгээс 2024 оны MAMA Awards-ын хүндэт зочдыг даваа гаригт өөрсдийн сошиал хуудсаар дамжуулан танилцуулсан байна. Энэ жилийн шагнал гардуулах ёслолын арга хэмжээнд “Pachinko” киноны жүжигчин Ким Мин Ха, Марвелын  “The Eternals” кинонд дүр бүтээсэн, хамгийн сүүлд “The Roundup: Punishment” киногоо үзэгчдийн хүртээл болгосон жүжигчин Ма Дун Сок (Don Lee), “Squid Game” цувралын эхний бүлэгт тоглосон жүжигчин, загвар өмсөгч Жун Хо Ён, жүжигчин Бён Ү Сок, Сё Ин Гук, Пак Сё Жүн, Dex, Гак Дун Ён, продюссер На Хён Сук зэрэг Өмнөд Солонгосын урлаг соёлын олон алдартнууд ирж оролцохоор болжээ. 2024 оны MAMA Awards ирэх сарын 21-ний өдөр АНУ-ын Лос Анжелес хотын алдарт Dolby Theatre-т зохиогдох бөгөөд үргэлжлээд 22, 23-ны өдрүүдэд Японы Осака хотын Kyocera Dome цогцолборт k-pop уран бүтээлчдийн тоглолтыг давхар зохион байгуулахаар төлөвлөжээ.