Хэдхэн хоногийн өмнө “Big Bang” хамтлагийн ахлагч G-Dragon өөрийн инстаграм хуудсаараа дамжуулан “Эргэн ирэх” гэж байгаа талаараа тизер бичлэгээ цацсан. Түүний хувьд өмнө нь хоёр удаа тизер бичлэгээ нийтлээд байсан.
Тэгвэл өнөөдөр “Power” дуугаа цацаж, урлагийн ертөнцөд эргэн ирлээ. Тэрээр хамгийн сүүлд долоон жилийн өмнө ганцаарчилсан уран бүтээлээ цацаж байсан билээ. Ийн шинэ дуугаараа эргэн ирсэн тэрээр 2024 оны Mama Awards-д оролцоно. Түүний хувьд есөн жил завсарласны дараа Солонгосын алдартай хөгжмийн шагнал гардуулах ёслолд оролцох гэж байгаа нь энэ юм.
К-попын хаад “Big Bang” эргэн ирэх үү
Өмнөд Солонгос улсын К-поп урсгалыг дэлхий дахинаа түгэээж, алдар нэртэй болгоход хувь нэмрээ хэдэн сая шүтэн бишрэгчтэй болсон К-попын хаад бол “Big Bang” хамтлаг билээ. Тэд 2006 онд YG энтертайментаас дэбютээ хийж, 10 гаруй жилийн турш уран бүтээлээ туурвиж Өмнөд Солонгост төдийгүй дэлхийд нөлөөтэй хамтлаг болж чадсан. Хамтлагийн гишүүд 2018 онд цэргийн алба хаахаар уран бүтээлээс түр хөндийрсөн.
Харин 2019 онд хамгийн отгон гишүүн болох Сынри (Seungri) “Burning sun” шөнийн клубын дуулианд орооцолдсоноор хамтлагаа орхисон. Тэрбээр есөн төрлийн гэмт хэрэгт буруутгагдан 18 сарын хорих ял авсан билээ. Ийн дөрвөн гишүүнтэйгээр цэрэгт явцгаахаасаа өмнө “Flower road” нэртэй сингл уран бүтээлээ цацаж байсан юм.
Үүнээс хойш дөрвөн жилийн дараа эргэн нэгдэж 2022 оны дөрөвдүгээр сарын 4-нд шинэ уран бүтээл болох “Still life” дуугаа шүтэн бишрэгчдэдээ толилуулсан. Энэхүү дуу цацагдсан даруйдаа iTunes чартад нэгдүгээрт бичигдэн, Youtube-д 17 цагийн дотор 12 сая удаа үзэлттэй болсон.
“Lies”, “Haru Haru”, “Fantastic Baby”, “Bang Bang Bang” зэрэг хит дуунуудаараа ертөнцөд өөрийн гэсэн орон зай, өнгө аясыг тодотгосон “Big Bang” хамтлаг эргэн нэгдэж, шүтэн бишрэгчдээ баярлуулах уу. Хамтлагийн ахлагч G-Dragon уран бүтээлээ цацаж, эргэн ирлээ. 2026 онд тэдний 20 жилийн ой болох учиртай.
Өнгөрсөн тавдугаар сарын 24-ний өдөр Тэсон “ZIP Daesung’ нэвтрүүлгийнхээ үеэр YouTube сувгийнхаа захиалагчдаас ирсэн асуултуудад хариулж цагийг өнгөрөөжээ. Тэрээр үзэгчдээс ирсэн “Big Bang эргэн ирэх үү” асуултад “Юу болохыг хэлж чадахгүй байна. Бусад гишүүдийнхээ санаа бодлыг тусгаагүйгээр миний хувьд ойрын ирээдүйд бид дахин нэг тайзан дээр хамтдаа тоглох цаг гарч магадгүй” хэмээн хариулсан.
Өөрсдийн өнгө төрхөөрөө дэлхий дахина К-Поп урсгалыг дэлхийд таниулж, өөрсдийн нэрээ тамгалсан Big Bang эргэн ирж, шүтэн бишрэгчдээ баярлуулах уу. Цаг хугацаа харуулах биз ээ.