Өмнөд Солонгосын алдарт Blackpink хамтлагийн гишүүн Lisa “Alter Ego” хэмээх анхны соло цомгийнхоо сурталчилгаа болгож 3 минутын урттай тизер бичлэгийг мягмар гаригт цацсан байна. Түүний цомгийг гаргаж байгаа LLOUD лэйблийн Youtube хуудсанд цомгийн тизер бичлэг тавигдсанаас гадна Lisa-гийн өөрийнх нь албан ёсны вебсайт, инстаграм хуудсан дээр цомгийн мэдээллүүд цацагдлаа.

Lisa-гийн бүрэн хэмжээний студийн анхны цомог ирэх оны 2 дугаар сарын 28-ны өдөр худалдаанд гарах бөгөөд одоогийн байдлаар тус цомгоос “Rockstar”, дуучин Rosalia-тай хамтарсан “New Woman” болон сүүлд Victoria’s Secret брэндийн загварын шоун дээр дуулсан “Moonlit Floor” гэсэн гурван дууг цацчихаад байгаа юм.

Тэрээр өнгөрсөн 9 сарын эхээр зохион байгуулагдсан 2024 оны MTV Video Music Awards шагнал гардуулах ёслолоос “Rockstar” дуугаараа “Шилдэг K-Pop” шагналыг хүртсэн билээ.

Дуучин Lisa мөн дуу хөгжмөөсөө гадна кино урлагийн салбарт хүч сорихоор болж, HBO сувгийн “The White Lotus” инээдмийн олон ангит киноны 3 дугаар бүлэгт дүр бүтээж байгаа юм. Зураг авалт нь үргэлжилж байгаа тус цуврал ирэх онд дэлгэцнээ гарахаар төлөвлөгджээ.