Орхон аймгийн Жаргалант сумын Улаантолгой багийн Тасагийн гүүрний хажуугаар Даршидын голоор өнгөрсөн шөнө “Toyota Corolla Fielder” загварын суудлын автомашиныг гарч явахад нь мөс цөмөрч, суусан байна. Уг машинд 2 зорчигч явсан аж. Энэ тухай дуудлага 12-р сарын 2-ны 22:32 цагт онцгой байдлын албанд иржээ.

Тус аймгийн Онцгой байдлын газрын Аврах ангийн албан хаагчид уг дуудлагаар очин, иргэн Н-ийн машиныг татан гаргажээ.

Ховд аймгийн Манхан сумын Баянгол багийн Булангийн-Овоо гэдэг газар Хар-Ус нуурын мөс цөмөрч, 3 зорчигчтой бага оврын ачааны автомашин суусан байна. Уг осол 12-р сарын 2-ны 11:40 цагт гарчээ. Тус аймгийн Онцгой байдлын газрын Аврах ангийн албан хаагчдыг очиход, иргэн А-гийн “Hyundai Porter” загварын бага оврын ачааны машин Хар-Ус нуурын эргээс 500 метрийн зайд мөсөнд цөмөрч, суусан байсан аж.