Их Британийн BBC агентлагийн зүгээс 2024 оны дэлхийн 100 онцлох эмэгтэйчүүдийн жагсаалтаа мягмар гаригт танилцууллаа. Тус агентлагийн зүгээс энэ жил өөрийн ажил хэрэг, ололт амжилтаараа улс эх орондоо болон дэлхийд нөлөө үзүүлж, бусдад урам зориг өгсөн онцлох 100 эмэгтэйг сонгосноо танилцуулаад байна.
Энэхүү жагсаалтанд задгай сансарт хамгийн олон цаг гарч ажилласан эмэгтэйн дээд амжилтыг эзэмшдэг АНУ-ын сансрын нисгэгч Сунита Уилльямс, Олимпын медальт Бразилын уран гимнастикийн тамирчин Ребекка Андраж, Америкийн гүйлтийн тамирчин Аллисон Феликс, Их Британийн поп дуучин Raye, 2018 оны Нобелийн энх тайвны шагналт хүний эрхийн төлөө тэмцэгч Надя Мурад, Холливудын алдарт жүжигчин Шэрон Стоун, хүчингийн хэргийн хохирогч Францын иргэн Жизель Пеликот, Английн зураач Трейси Эмин, Пулитцерын шагналт Мексикийн зохиолч Кристина Ривера Гарза, уур амьсгалын өөрчлөлтийн эсрэг тэмцэгч Нигерийн идэвхтэн Аденике Оладосу гэх зэрэг 100 эмэгтэйг онцлоод байна.
BBC агентлагийн зүгээс дээрх зуун эмэгтэйг өөрсдийн даван туулах чадварынхаа ачаар эргэн тойрондоо, улс эх орондоо, дэлхийд өөрчлөлт авчирч байгаа явдлыг тэмдэглэн, тэдний явуулж байгаа үйл ажиллагаа, ажил хэргийг олон улсад танилцуулж, магтан сайшааж, түгээн дэлгэрүүлэх үүднээс жагсаалтыг гаргажээ. Дайн байлдаан, зөрчил мөргөлдөөнтэй Газын зурвас, Ливан, Украин, Судан улсуудаас эхлээд түүхэнд байгаагүй хамгийн олон сонгууль явагдсан энэ 2024 онд эмэгтэйчүүд олон сорилттой нүүр тулж, даван туулах чадвараа улам нэмэгдүүлэх шаардлага үүссэнийг тус агентлагийн зүгээс тодотгосон байна.
Уншигч та энэ оны дэлхийн онцлох 100 эмэгтэйн жагсаалтыг ЭНД ДАРЖ үзэх боломжтой.