Ромын Пап Францис удахгүй хэвлэгдэн гарах гэж байгаа намтар номдоо 2021 онд Иракт хийсэн айлчлалынхаа үеэр дэлбэрэлтийн бай болох гэж байсан талаараа өгүүлсэн байна. Түүний өгүүлснээр Ромын Папын биедээ тэсрэх бөмбөг зүүсэн хоёр амиа золиослогч этгээд түүний амь насанд халдахыг оролдсон ч Иракийн цагдаа нар тэднийг амжиж зогсоосон гэжээ. Амиа золиослогчдыг Их Британийн тагнуулын албаныхны тусламжтайгаар амжиж зогсоосон талаар Ромын Пап Францис намтартаа бичсэн байна. Тодруулбал, Ромын Папын 2021 оны 3 сард Иракт хийсэн айлчлалын эхэнд Британийн тагнуулууд Иракийн цагдаагийн газарт биедээ тэсрэх бөмбөг зүүсэн эмэгтэйг халдлага үйлдэхээр Францисын очсон Мосул хот дах байрлалд очиж байгаа талаар, мөн тухайн байршлыг чиглэн ачааны автомашин хурдтай хөдөлж байгаа мэдээлэл өгч байсан гэдгийг бичжээ. Ромын Пап Францис Ирак улсад айлчилсан анхны католик шашны тэргүүн болж, түүхэнд нэрээ үлдээсэн бөгөөд тэрээр түүнийг устгах гэж байсан амиа золиослогчдод юу тохиолдсон талаар Ватиканы аюулгүй албаныхнаас асуухад “тэд байхгүй болсон” хэмээн хариулсан гэжээ. Тухайн үед Ромын Пап Ирак дахь цөөн тооны католик шүтлэгтнүүдтэй уулзаж, мөн муслим шашны шийт урсгалын дээд номлогч Аяатолла Али аль Систани-тай уулзаж байсан юм. Мягмар гаригт 88 насны төрсөн өдрөө тэмдэглээд байгаа Ромын Пап Францисын намтар түүхийн талаар Италийн зохиолч Карло Муссо-той хамтран бичсэн “Hope” буюу “Итгэл найдвар” хэмээх ном 2025 оны 1 сард хэвлэгдэн гарахаар болсон байна.