Өнгөрсөн бямба гарагт Испанид цанын баазын суудалтай лифт өндрөөс унасны улмаас олон арван хүн бэртэж гэмтэн, 2 эмэгтэй хүндээр гэмтсэн байна.

Испанийн Пиренейн уулсын дунд байрладаг Астун хэмээх цанын бааз бүхий өвлийн амралт зугаалгын цогцолборт гарсан дээрх ослын улмаас 30 орчим хүн бэртэж гэмтэн, 10 нь эмнэлэгт хүргэгдсэнээс 18 настай хоёр эмэгтэйн биеийн байдал маш хүнд байгаа талаар Испанийн RTVE телевиз мэдээлжээ.

Хүнд бэртэл гэмтэл авсан залуу охидыг нисдэг тэргээр зөөвөрлөн, ойролцоох Зарагоза хотын эмнэлэгт хүргэсэн талаар орон нутгийн хэвлэлүүд мэдээлсэн байна.

Уулын оройд гаргадаг суудалтай лифтийг дээш нь татдаг нэг талын татагч төхөөрөмж суларсны улмаас хэд хэдэн суудалтай лифт доош унаж, зарим нь 15 метрийн өндрөөс унжсан ажээ.

Осолтой холбогдуулан бүхий л шаардлагатай арга хэмжээг авч эхлүүлээд байгаа талаар тухайн цанын баазад очиж ажиллаж, нөхцөл байдалтай газар дээр нь танилцсан Испанийн дотоод хэргийн сайд Роберто Бермудез де Кастро болон Арагон бүс нутгийн ерөнхийлөгч Хорхе Азкон нар мэдэгдсэн байна. Испанийн ерөнхий сайд Педро Санчез мөн Хорхе Азконтой холбогдож, засгийн газрын дэмжлэг туслалцаа үзүүлэхэд бэлэн байгаагаа илэрхийлснээ мэдэгджээ.