Ирэх сард зохиогдох Берлины олон улсын кино наадмын дээд шагнал болох “Алтан баавгай” шагналын төлөө өрсөлдөх бүтээлүүдийг танилцуулаад байна.
75 дах удаагийн Берлины олон улсын кино фестивалийн дээд шагналын төлөө нийт 19 кино өрсөлдөхөөр болсны дотор нэр хүндтэй, туршлагатай найруулагчдаас гадна мөн шинэ залуу найруулагчдын бүтээл ч багтжээ.
Тэдний заримаас дурдвал өмнө нь “Алтан баавгай” шагнал хүртэж байсан Францын найруулагч Люсиль Хаджихалилович “Мөсөн цамхаг”, 2021 оны “Алтан баавгай” шагналын эзэн болох Румын улсын найруулагч Раду Жүд “Континенталь 25”, Америкийн алдарт найруулагч Ричард Линклейтер “Хөх сар”, “Алтан баавгай” шагналыг 4 удаа хүртсэн Өмнөд Солонгосын найруулагч Хон Сан-сү “Байгал чамд юу гэж хэлэв” гэх зэрэг 19 кино өрсөлдөхөөр болжээ.
Гол шагналын төлөө мөн Украины найруулагч Катерина Горностай-н “Цаг хугацааны тамга” хэмээх цорын ганц баримтат кино өрсөлдөж байна. Түүнчлэн 19 киноны 8-ыг нь эмэгтэй уран бүтээлчид найруулсан байна.
2025 оны Берлины олон улсын кино наадмын “Алтан баавгай” шагналд нэр дэвшиж буй уран бүтээлүүдийг доор танилцуулья:
“Ari” (Франц, Бельги) – найруулагч Леонор Серрай
“Blue Moon” (АНУ, Ирланд) – найруулагч Ричард Линклейтер
“The Safe House” (Швейцарь, Люксембург, Франц) – найруулагч Лионель Байер
“Dreams” (Мексик) – найруулагч Мишель Франко
“Dreams” (Норвеги) – найруулагч Даг Йохан Хаугеруд
“What Does that Nature Say to You” (Өмнөд Солонгос) – найруулагч Хон Сан-сү
“Hot Milk” (Их Британи) – найруулагч Ребекка Ленкевич
“If I Had Legs I’d Kick You” (АНУ) – найруулагч Мэри Бронстейн
“Kontinental ’25” (Румын) – найруулагч Раду Жүд
“The Message” (Аргентин, Испани) – найруулагч Иван Фунд
“Mother’s Baby” (Австри, Швейцарь, Герман) – найруулагч Йоханна Модер
“The Blue Trail” (Бразил, Мексик, Чили) – найруулагч Габриэль Маскаро
“Reflection In A Dead Diamond” (Бельги, Люксембург, Итали, Франц) – найруулагч Эллен Каттет
“Living The Land” (Хятад) – найруулагч Хуо Мэн
“Timestamp” (Украин, Люксембург, Нидерланд, Франц) – найруулагч Катерина Горностай
“The Ice Tower” (Франц, Герман) – найруулагч Люсиль Хаджихалилович
“What Marielle Knows” (Герман) – найруулагч Фредерик Хамбалек
“Girls On Wire” (Хятад) – найруулагч Вивиан Чү
“Yunan” (Ger-Can-It-Palestine-Qat-Jor-Saudi) – найруулагч Амир Фахер Элдин
Энэ жилийн Берлины кино наадмын тусгай шагналын нэг болох хүндэтгэлийн “Алтан баавгай” шагналыг кино урлагт оруулсан хувь нэмрийг үнэлж, Шотландын жүжигчин Тильда Свинтонд гардуулахаар болжээ. Харин кино наадмыг найруулагч Том Тыкверын “The Light” хэмээх шинэ киногоор нээхээр болсон байна. Мөн энэ жилийн шүүгчдийн баг бүрэлдэхүүнийг Америкийн найруулагч Тодд Хэйнс даргалан ажиллах бөгөөд 75 дах удаагийн Берлины олон улсын кино наадам ирэх сарын 13-23-ны өдрүүдэд зохион байгуулагдана.