97 дах удаагийн Академийн шагналд нэр дэвшигчдийг танилцуулах арга хэмжээ пүрэв гарагт Беверли Хиллс хотын Самюэль Голдвин театрт зохион байгуулагдсан байна. Энэ жилийн Оскарын шагналд нэр дэвшигчдийн жагсаалтыг жүжигчин Рэйчел Сеннот, Боуэн Ян нар зарлан танилцууллаа. Энэ сарын 17-ны өдөр нэр дэвшигчдийг танилцуулах хуваарьтай байсан ч Лос Анжелесийн ой хээрийн түймрийн улмаас хойшлуулж, 23-ны өдөр танилцуулжээ.

Энэ жилийн Оскарт нийт 13 төрөлд нэр дэвшсэн “Эмилиа Перез” кино хамгийн олон төрөлд өрсөлдөж байгаа уран бүтээлээр тодорч, мөн хамгийн олон төрөлд нэр дэвшсэн гадаад хэл дээрх киноны дээд амжилтыг шинэчлэн тогтоолоо. Түүнчлэн тус киноны гол дүрийг бүтээсэн Испанийн жүжигчин Карла Софиа Гаскон Оскарын шилдэг гол дүрийн эмэгтэй жүжигчинд нэр дэвшсэн анхны трансжендер уран бүтээлчээр тодроод байна. Уг кинонд тоглосон жүжигчин Зои Салдана шилдэг туслах дүрийн эмэгтэй жүжигчний шагналд нэр дэвшсэн бол киноны өөр нэгэн туслах дүрийг бүтээсэн дуучин, жүжигчин Селена Гомез ямар нэгэн шагналд нэр дэвшигдээгүй байна.

“Эмилиа Перез” киноны араас “The Brutalist” болон “Wicked” кинонууд тус бүр 10 төрөлд нэр дэвшин, хамгийн олон төрөлд өрсөлдөж байгаа кинонуудаар нэрлэгдлээ.

“The Substance” киноны дүрээрээ анхны “Алтан бөмбөрцөг” шагналаа гардан авсан жүжигчин Деми Мур мөн шилдэг гол дүрийн эмэгтэй жүжигчний шагналд нэр дэвшсэн нь онцлох үйл явдлын нэг байлаа. Өдгөө 62 настай Деми Мур анх удаагаа Оскарт нэр дэвшиж байгаа нь энэ бөгөөд тэрээр “үнэхээр нэр төрийн хэрэг болж байна, сүүлийн хэдэн сар миний мөрөөдөлд ч байгаагүй галзуу үргэлжилж байна” хэмээн хэлсэн байна.

Харин шилдэг эрэгтэй гол дүрийн жүжигчний шагналын төлөөх өрсөлдөөн энэ долоо хоногт хоёр дах удаагаа ерөнхийлөгчийн тангараг өргөж, албандаа ороод байгаа АНУ-ын ерөнхийлөгч Д.Трампын дүрийг “The Apprentice” кинонд бүтээсэн жүжигчин Себастьян Стэн, Унгарын архитекторын дүрийг “The Brutalist” кинонд бүтээсэн Оскарын шагналт жүжигчин Эдриан Броди болон Нобелийн утга зохиолын шагналт, Америкийн рок дуучин, хөгжмийн зохиолч Боб Диланы дүрийг “A Complete Unknown” кинонд бүтээсэн жүжигчин Тимтои Шаламе нарын хооронд явагдах талаар салбарын ажиглагчид онцолж байна. 29 настай жүжигчин Тимоти Шаламе ийнхүү шилдэг гол дүрийн эрэгтэй жүжигчний шагналд хоёр удаа нэр дэвшсэн хамгийн залуу жүжигчнээр тодорч байна. Түүний өмнө уг амжилтыг 1950-иад оны үед нэрт жүжигчин Жеймс Дин тогтоож байсан түүхтэй.

Ингээд энэ жилийн Оскарын наадмын гол шагналд нэр дэвшиж буй кино болон уран бүтээлчдийг танилцуулья:

Шилдэг кино

• Anora
• The Brutalist
• A Complete Unknown
• Conclave
• Dune: Part Two
• Emilia Pérez
• I’m Still Here
• Nickel Boys
• The Substance
• Wicked

Шилдэг найруулагч

• Шон Бэйкер – Anora
• Брэйди Корбет – The Brutalist
• Жеймс Мэнголд – A Complete Unknown
• Жак Одияр – Emilia Pérez
• Корали Фаржа – The Substance

Шилдэг гол дүрийн эрэгтэй жүжигчин

• Эдриен Броди – The Brutalist киноны Ласло Тотын дүр
• Тимоти Шаламе – A Complete Unknown киноны Боб Диланы дүр
• Колман Доминго – Sing Sing киноны Жон Уитфилдийн дүр
• Ральф Файнс – Conclave киноны Кардинал Томас Лоуренсын дүр
• Себастьян Стэн – The Apprentice киноны Дональд Трампын дүр

Шилдэг гол дүрийн эмэгтэй жүжигчин

• Синтиа Эриво – Wicked киноны Элфаба Троппын дүр
• Карла Софиа Гаскон – Emilia Pérez киноны Эмилиа Перез/Хуан Дэл Монтегийн дүр
• Майки Мэдисон – Anora киноны Анора “Эни” Михеевагийн дүр
• Дэми Мур – The Substance киноны Элизабет Спарклын дүр
• Фернанда Торрес – I’m Still Here киноны Юнис Пайвагийн дүр

Шилдэг туслах дүрийн эрэгтэй жүжигчин

• Юра Борисов – Anora киноны Игорийн дүр
• Кийран Калкин – A Real Pain киноны Бенжи Капланы дүр
• Эдвард Нортон – A Complete Unknown киноны Пит Сигерийн дүр
• Гай Пирс – The Brutalist киноны Харрисон Ли Ван Бурен Сениорын дүр
• Жереми Стронг – The Apprentice киноны Рой Коны дүр

Шилдэг туслах дүрийн эмэгтэй жүжигчин

• Моника Барбаро – A Complete Unknown киноны Жоан Баезын дүр
• Ариана Гранде – Wicked киноны Галиндаа Аплэндийн дүр
• Фелисити Жонес – The Brutalist киноны Эржебет Тотын дүр
• Изабелла Росселлини – Conclave киноны Агнесын дүр
• Зои Салдана – Emilia Pérez киноны Рита Мора Кастрогийн дүр

Шилдэг энимейшн

• Flow
• Inside Out 2
• Memoir of a Snail
• Wallace & Gromit: Vengeance Most Fowl
• The Wild Robot

Шилдэг олон улсын кино

• Emilia Pérez (Франц) – испани хэл
• Flow (Латви) – латви хэл
• The Girl with the Needle (Дани) – дани хэл
• I’m Still Here (Бразил) – португал хэл
• The Seed of the Sacred Fig (ХБНГУ) – перс хэл

Шилдэг киноны хөгжим

• The Brutalist киноны хөгжмийн зохиолч Дэниэль Блумберг
• Conclave киноны хөгжмийн зохиолч Фолкер Бертельманн
• Emilia Pérez киноны хөгжмийн зохиолч Клемент Дюколь, Камилль
• Wicked киноны хөгжмийн зохиолч Жон Пауэлл, Стивен Шварц
• The Wild Robot киноны хөгжмийн зохиолч Крис Боуэрс

Шилдэг зураглаач

• The Brutalist киноны зураглаач Лол Кроули
• Dune: Part Two киноны зураглаач Грэйг Фрэйзер
• Emilia Pérez киноны зураглаач Пол Гийом
• Maria киноны зураглаач Эд Лахман
• Nosferatu киноны зураглаач Ярин Блашке

Шилдэг эвлүүлэг

• Anora киноны эвлүүлэгч Шон Бэйкер
• The Brutalist киноны эвлүүлэгч Дэвид Янксо
• Conclave киноны эвлүүлэгч Ник Эмерсон
• Emilia Pérez киноны эвлүүлэгч Жульетт Велфлинг
• Wicked киноны эвлүүлэгч Майрон Керстин

Шилдэг визуал эффект

• Alien: Romulus
• Better Man
• Dune: Part Two
• Kingdom of the Planet of the Apes
• Wicked

Шилдэг хувцас загвар

• A Complete Unknown киноны хувцасны зураач, загвар зохион бүтээгч Арианна Филипс
• Conclave киноны хувцасны зураач, загвар зохион бүтээгч Лизи Кристл
• Gladiator II киноны хувцасны зураач, загвар зохион бүтээгч Янти Ейтс, Дэйв Кроссман
• Nosferatu киноны хувцасны зураач, загвар зохион бүтээгч Линда Муир
• Wicked киноны хувцасны зураач, загвар зохион бүтээгч Пол Тэйзвелл

97 дах удаагийн Академийн шагнал гардуулах ёслолын арга хэмжээ 3-р сарын 2-ны өдөр Лос Анжелес хотын Dolby Theatre цогцолборт зохион байгуулагдана. Ёслолын арга хэмжээний үеэр нийт 23 төрөлд Оскарын шагнал гардуулах бөгөөд АНУ-д ABC телевиз болон стрийминг үйлчилгээний Hulu платформоор шууд дамжуулах юм. Энэ жилийн Оскарын наадмыг телевизийн хөтлөгч, комедиан Конан О‘Брайн анх удаагаа хөтлөн хүргэхээр болоод байгаа бол өнгөрсөн жилийн наадмын гүйцэтгэх продюсерээр ажилласан Раж Капур, Кэйти Мюллан, мөн найруулагч Хэмиш Хамильтон нар ахин ажиллахаар болсон байна.