Бельгийн хөл бөмбөгч Раджа Найнгголаныг хар тамхины сүлжээтэй холбоотой хэргийг мөрдлөгтэй холбогдуулан баривчилсан байна.

Тодруулбал, 36 настай хөл бөмбөгч Раджа Найнгголаныг кокаины төрлийн мансууруулах бодисын хууль бус наймааны хэргийг мөрдөн шалгах хүрээнд Бельгийн цагдаа нар сэжигтнээр татан, даваа гарагийн өглөө баривчилжээ.

Дээрх хэрэгтэй холбогдуулан Бельги улсын хэмжээнд хэд хэдэн баривчилгааг нэгэн зэрэг явуулсан бөгөөд нийслэл Брюссель хотын прокурорын газраас гаргасан мэдэгдэлд “Өмнөд Америкаас Европ руу Бельгийн Антверпены боомтоор дамжуулан кокаины төрлийн мансууруулах бодисыг хууль бусаар хил давуулж, импортлосон хэрэгтэй холбогдуулан мөрдөн шалгах ажиллагааг гүйцэтгэж байгаа” гэжээ.

Дээрхээс өөр дэлгэрэнгүй мэдээллийг олон нийтэд хийгээгүй байна.

Хөл бөмбөгөөс удаан хугацаанд завсарлага аваад байсан Раджа Найнгголан Бельгийн хөл бөмбөгийн хоёрдугаар дивизионы Локерен багтай гэрээ байгуулаад ердөө 6-хан хонож байхдаа ийнхүү хар тамхины хэрэгт холбогдон баривчлагдаад байна. 

Антверпен хотод төрсөн хөл бөмбөгч Р.Найнгголан нь замналынхаа ихэнх хугацааг Италийн Рома болон Интер Милан багуудад тоглож өнгөрүүлсэн байдаг бөгөөд 2009-2018 оны хооронд тэрээр Бельгийн үндэсний шигшээ багийн төлөөх нийт 30 тоглолтонд оролцож байсан ажээ.