Өмнөд Солонгос улсад даваа гарагаас эхлэн их хэмжээний цас орсны улмаас авто тээврийн зорчих хөдөлгөөнд саад учруулж, Цагаан сарын баярын амралтуудаар хөдөө, орон нутгийг зорьсон иргэд түгжрэлд ороод байгаа талаар тус улсын хэвлэлүүд мэдээлж байна.
Даваа гарагаас орж эхэлсэн цасны хэмжээ мягмар гарагийн үдийн байдлаар өмнөд хэсгийн Чэжү аралд 61 см, нийслэл Сөүл хотоос зүүн өмнө зүгт 85 км-т байрладаг Жинчён хотод 42 см, баруун өмнөд хэсгийн Гванак хотод 16 см өндөр байлаа.
Солонгосын цаг уурын албаны урьдчилсан мэдээгээр тус улсын Чунчён болон Жолла мужуудад лхагва гарагийг дуустал 20 см өндөр цас үргэлжлэн орох бол нутгийн бусад хэсгүүдээр дээд тал нь 10 см өндөр цас орно гэжээ.
Их хэмжээний цас орсны улмаас улсын хэмжээнд олон тооны зам тээврийн ослууд бүртгэгдэж эхлээд байгаагаас гадна нийт 11 нислэг цуцлагдсаны дотор Инчоны нисэх онгоцны буудлаас хөөрөх хуваарьтай 68 нислэг багтсан байна.
Түүнчлэн зорчигч тээврийн галт тэрэг, усан онгоцны төлөвлөгөөт хуваарийн дагуу үйлчилгээнд мөн саатал үүсч, KTX хурдны галт тэргүүд аюулгүй байдлын үүднээс хурдаа сааж, удаан явж байгаа ажээ.
Мөн ард иргэдийн аюулгүй байдлын үүднээс улсын хэмжээнд нийт 20 үндэсний цэцэрлэгт хүрээлэнгүүдийн үүд хаалгыг бариад байгаа талаар албаныхны зүгээс мэдэгджээ.