Монголын хэвлэл мэдээллийн салбарт өөрийн зохицуулалтын тогтолцоо бий болж, Хэвлэл Мэдээллийн Зөвлөл (ХМЗ) байгуулагдсаны 10 жилийн ой 2025.01.28-нд боллоо. Энэ ойд Европын холбооны Элчин сайд Ина Марчюлёните, ХБНГУ-ын Элчин сайд Хэльмут Кулитц, Фридрих-Эбертийн сангийн суурин төлөөлөгч Штефани Ханкэ нарын зочид оролцож, баяр хүргэн, амжилт хүслээ.
Тус зөвлөлийг байгуулагдахаас нь эхлэн, өдий хүртэл туршлагаа хуваалцаж ирсэн Германы Хэвлэлийн консулын гишүүн Манфред Протцег Монгол Улсын Ерөнхийлөгч “Алтангадас” одонгоор шагнасан юм. Энэ шагналыг сэтгүүлчид “Нүдээ оллоо” хэмээн талархан тосов. Манфред Протце “Дэлхийн олон улс Хэвлэлийн зөвлөлтэй болохоор оролдсон. Ихэнх нь чадаагүй. Би олон орны сэтгүүлчдийн ийм оролдлогыг дэмжиж, туршлагаа хуваалцсан. Тэдний ихэнх нь зөвлөлөө байгуулж чадаагүй. Харин Монгол Улс чадсан. Та нар чадсан юм шүү” хэмээн онцолсон юм.
Энэ ойн баярын үеэр Хэвлэл мэдээллийн ёсзүйг дэмжигч байгууллагаас дуудлага худалдаа зохион байгуулав. Үндэсний урлагийн их театрын гоцлол хөгжимчин, “Мөнгөн мод 2023” наадмын шилдэг хөгжимчин Г.Солонгын “Солонго” цомгийн үнийг 300.000 төгрөгөөс эхлэн дуудаж, Солонгон рейкийн мастер багш, хувь хүний хөгжлийн коуч Дамбадоржийн Болормаа 3.5 сая төгрөгийн үнэ хэлж, энэ пянзны эзэн боллоо. Д.Болормаа цомгоо гардан авахдаа “Нийгэмд сайн сайхныг авчрах, зөв жишиг болох зүйлд хүн хандив өргөдөг байх хэрэгтэй. Монголчууд маань хандив өргөх соёлд суралцах хэрэгтэй. Би ХМЗ-ийг дэмжих санд 5 сая төгрөг хандивлаж байна. Цаашид жил бүр энэ санд 5 сая төгрөг хандивлана” гэж хэлсэн юм. Ийн ХМЗ ойн баярынхаа үеэр байнгын хандивлагчтай боллоо.
Үүний дараа “Хэвлэл мэдээллийн ёс зүйн зарчим”-ын монгол бичгээр бичсэн цор ганц хувилбарыг 500 мянган төгрөгөөс эхлэн дуудав. “Хэвлэл мэдээллийн ёс зүйн зарчим” бол сэтгүүлч, зураглаач, зурагчин, найруулагч, эвлүүлэгч, дизайнер гээд хэвлэл мэдээллийн салбарынхны “Үндсэн хууль” юм. Монголын сэтгүүлчдийн 10 жил мөрдсөн уг зарчмыг “А стар Монголия”, “Мондижитал тур” ХХК-ийн захирал Хасбаганы Ариунчимэг 5 сая төгрөгөөр үнэ цохиж авлаа. Х.Ариунчимэг бол ХМЗ-ийг анх үүсгэн байгуулалцсан хүмүүсийн нэг. Энэ зөвлөлийн үүсгэлийг тавьсан “Медиа консул” клүбийн гишүүн. Германд боловсрол эзэмшсэн сэтгүүлч, доктор. Тэрээр Герман дахь монголчуудаас Хэвлэл мэдээллийн ёсзүйг дэмжигч байгууллагад хандив цуглуулаад иржээ.
Германд дээд боловсрол эзэмшсэн, бизнес эрхлэгч бүсгүйчүүд энэ дуудлага худалдаанд идэвхтэй оролцсон нь онцлог байлаа.
Орон нутгийн хэвлэл мэдээллийн холбоо ХМЗ-д бэлэн мөнгө хандивласан юм. Үүний зэрэгцээ Хэвлэл мэдээллийн ёсзүйг дэмжигч байгууллагад жил бүр 1 сая төгрөг хандивлах давхар бэлэгтэй иржээ. Ийн ХМЗ ойн баярынхаа үеэр 2 донортой боллоо.
Хэвлэл мэдээллийн ёсзүйг дэмжигч байгууллага нь ХМЗ-ийн ёсзүйн хорооны үйл ажиллагаа, түүний хөгжил дэвшил, үзэл санааг тогтвортой дэмжих үндсэн зорилготойгоор 2023 оны 12 дугаар сард олон нийтийн санаачилгаар байгуулагдсан юм. ХМЗ хэвлэл мэдээллийн салбарт хариуцлага төлөвшүүлэх, мэргэжлийн ёс зүй сахиулах зорилгоор 2015 оноос хойш үйл ажиллагаа явуулж байна. Дэмжигч байгууллага нь энэхүү зөвлөлийн Ёсзүйн хорооны бие даасан, хараат бус байдлыг хангах, тогтвортой үйл ажиллагааг дэмжих, ёс зүйн өөрийн зохицуулалтын ач холбогдлыг олон нийтэд таниулах зэргээр ардчилсан чөлөөт хэвлэл мэдээллийн суурь зарчмыг Монгол Улсад дэмжин дэлгэрүүлэхэд хувь нэмэр оруулж байгаа юм.