Ховд аймгийн Онцгой комисс өчигдөр хуралдаж, тулгамдсан хоёр асуудлыг хэлэлцэв. “Шинэ Ховд Жаргалант” ТҮК-ийн ажлын байрны халаалтын шугам сүлжээ хөлдөж, дулаан тасарчээ. ТҮК-ийн ажилчид өвлийн хүйтэнд гадаа ажиллаж байгаад, ажлын байрандаа орж дулаацах боломжгүй, хүндрэлтэй байгаа аж. Хөлдсөн шугамыг ойрын хугацаанд шуурхай солихоор комисс шийдвэрлэлээ.
Булган сумын орон сууцны айл өрх, 20 гаруй аж ахуйн нэгж, байгууллага цэвэр усаар хэвийн хангагдаж чадахгүй байна. Тус сумын шугам сүлжээ байсхийгээд доголддог болжээ. Шугам сүлжээг мэргэжлийн ямар байгууллагад хариуцуулах талаар Онцгой комиссын гишүүд санал солилцож, хууль журмын дагуу судлан шийдвэрлэхээр тогтлоо.