<p>Улсын хэмжээнд 76 мянган хүүхэд хувийн сургуульд суурь боловсролд хамрагдаж байна. Үүнээс 68 мянга нь нийслэлд буй. Монгол Улс 1 хүүхдэд жилд 1,8 сая төгрөгийн хувьсах зардал төсөвлөж байгаа. Гэхдээ төлбөрийн хэмжээнээс хамаарч 1 хүүхдэд ногдох хувьсах зардал харилцан адилгүй тусдаг. Олон хүүхэд элсүүлсэн том сургуулиуд төрөөс өндөр дүнтэй хувьсах зардал авна. Харин цөөхөн хүүхэдтэй жижиг сургуулиудад очих хувьсах зардал бага тусах нь. 2 жилийн өмнөөс 10 саяас дээш төлбөртэй сургуулиудад хувьсах зардал олгохоо зогсоож, хувьсах зардлын шаталсан хэмжээ тогтоосон байна.</p> <blockquote class="wp-block-quote is-layout-flow wp-block-quote-is-layout-flow"> <p>2025 оны улсын төсөвт ерөнхий боловсролын хувийн сургуулиудын хувьсах зардалд 38,5 тэрбум төгрөг төсөвлөжээ.</p> </blockquote> <p>Хэдийгээр улсаас хувийн сургуулиудад хувьсах зардал олгож байгаа ч хувийн сургуулиуд өөрсдөө төлбөр тогтоодог. Нийслэлд үйл ажиллагаа явуулж байгаа хувийн сургуулиудын төлбөр харилцан адилгүй байгаа юм. Тухайлбал: &#8220;International school of Ulaanbaatar&#8221; сургуулийн төлбөр хамгийн өндөр буюу 42.900 доллар байна. Валютын ханш өссөнтэй холбоотойгоор тус сургуульд хүүхдээ сургаж байгаа эцэг эхчүүд ахлах ангийн хүүхдийнхээ төлбөрт жилд 190 сая төгрөг зарцуулдаг.</p> <p> “British school of Ulaanbaatar”-ын хувьд жилийн сургалтын төлбөр 72 сая төгрөг. &#8220;Орчлон&#8221; сургуулийн нэг сурагчийн жилийн төлбөр 67 сая төгрөг бол “Шинэ-Үе”, “Сант”, “Олонлог”, “Jet”, “Шинэ Монгол Харумафүжи”, “Сэлбэ” зэрэг сургуулийн төлбөр 15-25 сая төгрөгийн хооронд хэлбэлзэж байгаа мэдээлэл буй. </p> <p>Ерөнхий боловсролын хувийн сургуулиуд сургалтын төлбөрөө өнгөрөгч 12-р сараас нэмж эхэлжээ. Шалтгаан нь эрчим хүч, дулааны төлбөр өссөнтэй шууд холбоотой. Харин 10 саяас бага төлбөртэй сургуулиудын төлбөрт цахилгаан, дулааны үнийн өсөлт 1,5-3 сая төгрөгөөр нөлөөлсөн тухай тухай эх сурвалжууд хэлж байна.</p> <p></p>