Өнөөдрийн Засгийн газрын хуралдаанаар хайгуулын тусгай зөвшөөрөлтэй холбоотой шинэ журмыг танилцуулсан байна. Энэ талаар Аж үйлдвэр, эрдэс баялгийн сайд Ц.Туваан мэдээлэл өглөө.

 Ц.Туваан: Монгол Улсад ашиглалтын болон хайгуулын 2700 орчим лиценз байдгаас 900 гаруйг хайгуулын лиценз эзэлдэг. Олон улсын практикт ашиглалтын лицензээс олон хайгуулын лиценз олгож байж, хайгуул хийсэн талбайгаас ашигт малтмалын орд илрэх магадлал нэмэгдэнэ. Гэтэл энэ харьцаа манайд урвуу хамааралтай байдаг. Мөн улс төрийн болон бусад шалтгаанаар хайгуулын лиценз олгох асуудал гацсан.

Аж үйлдвэр, эрдэс баялгийн сайдын тушаалаар хайгуулын лиценз сонгон шалгаруулах журам баталж, Хууль зүй, дотоод хэргийн яаманд хүргүүлж, нийтээр дагаж мөрдөх журамд бүртгүүлсэн. Ингэснээр хайгуулын тусгай зөвшөөрөл олгох боломж нээгдэнэ” гэв.

 Хайгуулын тусгай зөвшөөрлийн шинэ журмын заалтууд 

Нийт зарласан талбайн 50 хувьд сонгон шалгаруулалтаар хайгуулын тусгай зөвшөөрөл олгоно.

Сонгон шалгаруулалтын үнийн санал 70/30 байсныг 60/40 болгожээ.

Өмнө нь нэг оролцогчийг л шалгаруулдаг байв. Тэр хүн дуудсан үнээ байршуулаагүй бол тэр сонгон шалгаруулалт хүчингүй болдог байсан. Иймд хоёр оролцогч шалгаруулдаг болно.

Босго үнэ 4500 төгрөг байсныг 7000 болгожээ.

Хайгуулын болон ашиглалтын тусгай зөвшөөрлийг 2014 оноос сонгон шалгаруулалтын журмаар олгож байв. Энэ дагуу хайгуулын тусгай зөвшөөрлийг зөвхөн Ашигт малтмалын тухай хуулийн дагуу олгож байна.

Ашигт малтмалын тухай хуулийн 17 дугаар зүйлд заасны дагуу сонгон шалгаруулалтын талбайг ялгах нь төрийн захиргааны байгууллагын чиг үүрэг. Талбайн солбицлыг тодорхойлохдоо тухайн аймаг, нийслэлийн засаг даргад бичгээр, цахим шуудангаар дамжуулан мэдэгдэнэ.

17.3-т хайгуулын тусгай зөвшөөрөл олгох талбайн солбилцлыг энэ хуулийн 17.2-т заасны дагуу геологи, уул уурхайн асуудал эрхэлсэн төрийн захиргааны төв байгууллагын саналыг үндэслэн, Засгийн газар батална гэж тус тус хуульчилжээ.