Улс хоорондын шуудан илгээмж, карго ашиглан, мансууруулах эм, сэтгэцэд нөлөөт бодисыг улсын хилээр хууль бусаар нэвтрүүлэх гэмт хэрэг тодорхой давтамжтайгаар үйлдэгдэж байна. Энэ нь цөөн хүн амтай манай улсад аюул учруулж болзошгүй байгаа аж. Сүүлийн 8 жилийн хугацаанд Монгол Улсын хилээр хууль бусаар мансууруулах эм, сэтгэцэд нөлөөт бодис нэвтрүүлсэн 76 гэмт хэргийг илрүүлжээ. Үүний 37.9 хувийг газраар, 12.1 хувийг агаараар, үлдсэн 50 хувийг шуудан илгээмжийн үйлчилгээ ашиглан улсын хилээр нэвтрүүлсэн байна.

Гаалийн байгууллагаас энэ төрлийн гэмт хэргийн илрүүлэлтийг нэмэгдүүлэх, таслан зогсоох чиглэлд онцгойлон анхаарч, Улс хоорондын шуудан илгээмжийн гаалийн газрын гаалийн хяналтын бүсүүдийг орчин үеийн рентген, тоног төхөөрөмж болон мансууруулах эм, сэтгэцэд нөлөөт бодис илрүүлэх зориулалт бүхий тандагч багаж хэрэгслээр хангахаар зорьж байна.

Тагнуул, цагдаа, гаалийн байгууллага улс хоорондын шуудан илгээмжийн үйлчилгээг ашиглаж. мансууруулах эм, сэтгэцэд нөлөөт бодисыг улсын хилээр хууль бусаар нэвтрүүлэхийг завдаж буй чиглэл, урсгалд хамтран хяналт тавин, тодорхой үр дүн гарч байгаа аж. Энэ оны эхний 2 сарын байдлаар гаалийн байгууллага ийм 4 хэрэг илрүүлж, хууль хяналтын байгууллагад шилжүүлжээ.

Үүнтэй холбогдуулан. ГЕГ-ын Зөрчилтэй тэмцэх газар, Тагнуулын ерөнхий газар, ЦЕГ-ын Хар тамхитай тэмцэх газар, Харилцаа холбооны зохицуулах хороо хамтран улс хоорондын шуудан илгээмж, карго үйлчилгээ үзүүлэгч иргэн, аж ахуйн нэгжийн төлөөллүүдтэй уулзалт зохион байгууллаа. Улс хоорондын шуудангийн үйлчилгээ эрхлэгч аж ахуйн нэгжүүдийн төлөөлөлд мансууруулах бодисын хор хөнөөл, гадаад, дотоодын нөхцөл байдлыг танилцуулж, энэ төрлийн гэмт хэрэгтэй тэмцэх, гэмт хэрэгт иргэдийг холбогдохоос урьдчилан сэргийлэхэд төр хувийн хэвшлийн хамтын ажиллагааг өргөжүүлэх хэрэгцээ, шаардлага, тулгарч байгааг онцолж цаашид хэрхэн үр дүнтэй хамтран ажиллах талаар хэлэлцлээ.