Монгол улсын эрчим хүчний аюулгүй байдалд онцгой чухал ач холбогдолтой Газрын тос боловсруулах үйлдвэр байгуулах төсөл БНЭУ-ын бүх талын тусламж дэмжлэгтэйгээр хэрэгжиж байна. Тус улсын Засгийн газар төслийг санхүүжүүлэхээс гадна үйлдвэрийн төлөвлөлт инженерчлэлийн ажлыг гардан гүйцэтгэж байгаа төдийгүй төсөл эхэлсэн цагаас эхлэн манай улсын хувьд аж үйлдвэрийн цоо шинэ салбарын суурь болсон газрын тосны үйлдвэрт ажиллах нарийн мэргэжлийн инженерүүдийг бэлтгэх тал дээр ч онцгой анхаарал хандуулсаар ирсэн. Үүний нэг тод жишээ нь Энэтхэгийн засгийн газрын Техник-Эдийн засгийн хамтын ажиллагаа (ITEC)-ны хөтөлбөрийн хүрээнд 3 дахь удаагаа зохион байгуулагдаж буй бүрэн тэтгэлэгтэй сургалт юм.
Энэ удаагийн сургалтад Монгол Газрын тос боловсруулах үйлдвэр компанийн инженерүүдээс гадна төсөл хэрэгжүүлэгч компанийн санаачлагаар ШУТИС, МУИС-ийн хамтын ажиллагааны хүрээнд ШУТИС-д хэрэгжиж буй Газрын тос боловсруулах үйлдвэрийн инженер бэлтгэх ангийн оюутнууд болон багш нар хамрагдан Энэтхэг улсыг зорих гэж байна. Инженерүүд болон оюутнуудыг өнөөдөр БНЭУ-аас Монгол улсад суугаа онц бөгөөд бүрэн эрхт элчин сайд, ноён Атул Малхари Готсурве, “Монгол газрын тос боловсруулах үйлдвэр” ТӨХХК-ийн гүйцэтгэх захирал Д.Алтанцэцэг нар хүлээн авч уулзан, амжилт хүслээ.

“Энд цугласан залуус та бүхэн үнэхээр азтай юм. Та нарыг их сургуулиа төгсөнгүүт монгол улсын хөгжилд хамгийн чухал ач холбогдолтой, нэр хүндтэй “Монгол газрын тос боловсруулах үйлдвэр” ТӨХХК тосож авна. Газрын тос боловсруулах үйлдвэр бол стратегийн өндөр ач холбогдолтой төсөл учраас та нарт эх орныхоо хөгжлийн төлөө ажиллах сайхан боломж тохиох юм. Газрын тос боловсруулах үйлдвэртэй болох Монголчуудын хэдэн арван жилийн хүсэл мөрөөдлийг биеллээ олоход нь бид та бүхэнд тусалсаар байх болно. Та нарын суралцах гэж буй Инженерс Индиа лимитед компанийн Гуруграм хот дахь сургуулийн төгсөлтийн арга хэмжээнд биечлэн оролцох завшаан өнгөрсөн жил надад олдсон юм. Энэхүү сургууль нь орчин нөхцөл, сургалтын чанарын хувьд үнэхээр шилдэг учраас та нарт таалагдана гэдэгт итгэлтэй байна” хэмээн элчин сайд хэллээ.

10 долоо хоног буюу 70 хоногийн хугацаатай уг сургалтаар инженер, оюутнууд ГТБҮ байгуулах төслийн менежментийн зөвлөх Engineers India Limited компанийн туршлагатай, чадварлаг инженер, багш нараас онол, дадлага хосолсон мэдлэг олж авах юм. БНЭУ-ын Засгийн газрын энэхүү бүрэн тэтгэлэгтэй сургалтын хөтөлбөрт 2020 оноос эхлэн Монгол газрын тос боловсруулах үйлдвэр компанийн 60 орчим инженер мэргэжилтнүүд хамрагдаад байна.