Одоогийн Шадар сайд Т.Доржханд 2 жилийн өмнө 44 их наядын нүүрс хулгайлагдсан тухай зарлахад хэн хүнгүй шуугьж байсан. Тухайн үед жүжигчин У.Цогтбаяр үзэл бодлоо илэрхийлж, талбай дээр 10 гаруй хоног жагссан. Түүнийг дэмжсэн хэсэг байсан ч “Мөнгө аваад, жагсаж байна” гэж хардсан олонх ч байв. Тэгсхийгээд жагсаал ч намжиж, 44 их наядын нүүрсний хулгай ч мартагдав. Үүнээс хойш нам гүм болж, уран бүтээлээр үзэгчидтэйгээ мэндтэй байсан жүжигчин У.Цогтбаяртай ярилцлаа. Тэрээр ямар ч асуултад нээлттэй хариулна гэснээр бидний ярилцлага эхэлсэн юм. Цогтоо 44 их наядын нүүрсний хулгайг төрийн том эрх мэдэлтнүүд хүлээн зөвшөөрсөн гэдгийг онцолсон.

– Киногоо нээх гээд нэлээн завгүй байгаа байх. Уран бүтээлийн олз, омгоос нь ярилцлагаа эхлүүлье?

Кино маань гуравдугаар сарын 6-ны өдөр Монгол орон даяар нээлтээ хийх гэж байна. БНСУ-д дөрөвдүгээр сард нээлтээ хийнэ. Өөрийнхөө тоглосон, продюсерын оролцоотой киногоо анх удаа гадаадын зах зээлд нээх гэж байгаадаа сэтгэл догдлон, хүлээж байна.

– Гадны зах зээлд киногоо гаргах гэж байгаа учраас хариуцлага дагаад хийх ажил их буй байх. “In Da House-3” өмнөх хоёр ангиасаа юугаараа онцлог болсон бэ?

Үзэгчид сайн мэдэж байгаа байх. “In Da House-1” маань хэсэг цагдаагийн мөрдөгчид хэрэг илрүүлэхийн төлөө явж байгаад санамсаргүй байдлаар хоолны газар ажиллуулж, захиалга ихтэй тогооч нар болж хувирдаг. Харин хоёрдугаар анги дээрээ автын хэрэг мөрдөж байгаад, мөн санамсаргүй байдлаар Вьетнам засварчид болдог. Тэгвэл “In Da House-3” дээр санамсаргүй байдлаар Солонгосын олны танил дуучид болон хувирч мөрдлөгөө хийнэ. Үүгээрээ манай кино онцлогтой. Сонирхуулахад, дуутай, хөгжимлөг, эстрад комеди гэх юм уу, тийм өнгө аястай байгаа.

– Киноныхоо зургийг БНСУ-д авсан уу?

Зураг авалт 100% Солонгост хийгдсэнээрээ бусад уран бүтээлүүдээс онцлог болсон. Гадаадын оронд 100% хийгдсэн уран сайхны кино Монголд төдийлөн байдаггүй. Киноны зургаа бүгдийг нь гадаадад авснаараа авууштай санагдаж байгаа.

– Гадаад улсад киноны зураг авахад хэр байсан бэ. Мэдээж Монголд авахаас шал өөр байсан байх. Хүндрэл тохиолдсон уу эсвэл эсрэгээрээ амар байсан уу?

Сөүл хотод зураг авахын тулд маш олон зөвшөөрөл авдаг юм байна лээ. Мөн объект бүрийн үнэ тарифын асуудал нь маш нарийн зохион байгуулалттай, дүрэм журамтай. Түүндээ захирагддаг, их хэцүү юм билээ. Манай кино гэмт хэргийн сэдэвтэй шүү дээ. Биднийг Пусанд дөнгөж зураг авч эхэлж байхад цагдаа нар бүслээд хүрч ирсэн. Хууль хүчний хараа хяналт өндөр орон юм байна лээ. Нууцаар зураг авах гэсэн зүйл байхгүй. Манайхан ихэвчлэн нууцаар зураг авдаг  тал байдаг. Тийм боломжгүй юм байна лээ. Албан ёсны зөвшөөрөлтэй байх ёстой. Бид Солонгосын продакшнтай хамтарч, киногоо хийсэн болохоор энэ тал дээр ямар ч асуудал гараагүй.

“In Da House 3” КИНО НЭГ ТЭРБУМ ГАРУЙ ТӨГРӨГӨӨР БҮТСЭН

– Зураг авалт хэдий хугацаанд үргэлжилсэн бэ?

Зураг авалт 30 хоногийн турш болсон. Зураг авахын өмнөх бэлтгэл бол киноны хамгийн том ажил байдаг. Энэ бэлтгэлээ 3-4 сарын хугацаанд маш нарийн төлөвлөсөн. Киноны зохиолч, найруулагч Амартүвшин болон гол дүрийн 5 жүжигчин киноны үйл явдлын дарааллаа ярилцаж гаргасан.

– Кино бүтээж байхад үл ойлголцох асуудал хэр гардаг вэ?

Бүгд үндсэн үүргээ мэддэг болохоор асуудал гаргаад байдаггүй. Кинонд гарч байгаа нэг секунд бүрийн дүрсийг ерөнхий найруулагч маань шийддэг учраас найруулагчаа харна. Ингэчихвэл илүү инээдтэй болно гэж санагдаж байвал зураг авахын өмнө найруулагчтайгаа ярилцдаг. Энэ нь гол дүрийн 5 жүжигчин болон бусад жүжигчинд нээлттэй болохоор наана нь ярилцаж байгаад зураг авалтаа хийдэг. Инээдмийн кино болохоор яг зохиолын дагуу явах хэцүү байдаг. Тухайн орчинд ямар мэдрэмж төрөх нь үү, тэндээс ургаад яавал хүмүүст илүү хөгжилтэй байдлаар хүргэх үү гэж ч хийгддэг.

– Кино зохиол гарахаас өмнө жүжигчдээ сонгон шалгаруулсан уу? Эсвэл бичиж байхдаа жүжигчдээ тоочиглосон уу? Киноны жүжигчдийн бүрэлдэхүүнийг хэрхэн сонгон шалгаруулсан бэ?

Ерөнхий найруулагч продюсерууд бүгд тойрч суугаад энэ дүр дээр хэн байх вэ гэж ярилцаад шийддэг. Бид зохиолоо гаргачхаад, эсрэг талын дүрд Солонгосын “А” зэрэглэлийн, монголчуудын сайн мэдэх ур чадвартай ахмад жүжигчин тоглуулъя гэдгийг өмнө нь ярилцаад шийдсэн байсан. Тийм учраас Солонгосын компанитайгаа хамтарч ажиллахдаа санал тавихад, өөрсдөө сонгосон.

– Гадаадад зураг авсан. Мөн А зэрэглэлийн жүжигчин тоглосон, гадаадын компанитай хамтарсан гээд нэлээн өртөг өндөртэй бүтсэн байх. Нууц биш бол “In Da House” киног хэдэн төгрөгөөр бүтээсэн бэ?

Монголд 10 гаруй л кино театр байгаа. Гадаадын оронд дор хаяж 3000 театр байгаа. 3000 театраар 7 хоног гарах, Монголд 10 театраар 7 хоног гарах өөр. “In Da House-3” кино “Voo”, “Skymedia” хоёрын хөрөнгө оруулалттай төсөл. Үзэгчдэдээ гадаадын уран бүтээлчидтэй хамтарсан гайхалтай бүтээл хүргэе гэсэн үүднээс ашиг хараагүй гэж хэлж болно. Кинон дээрээ төдийлөн ашиг харахгүй байгаа. Солонгосчуудыг хуйлруулаад, байлдан дагуулж чадахгүй байх. Гэхдээ юмыг яаж мэдэх вэ? Хүнийг гаднаас нь хараад таашгүй гэдэг шиг юу болохыг мэдэхгүй. Монголд хүлээлт өндөр байгаа. Нийгэм маань ямар стресстэй байгаа билээ. Багцаагаар тэрбум гаруй төгрөгөөр кино маань бүтсэн.

– “+17” цуврал тухайн цаг үедээ маш өвөрмөц болж, шуугиан тарьсан. Цувралын санааг хэн гаргасан бэ?

Тухайн үед Жижгээ ах Оросын sketch комеди үздэг байсан. Харин би Америкийн богино sketch үйл явдалтай кино маягийн комеди бичлэгүүдийг их үздэг байсан. Надад stand-up шоу тоглолт хийх санал ирсэн. Гэхдээ тухайн үед Жижгээ ах надад санал тавьсан байсан учраас хоорондоо ярилцаад, инээдмийн цуврал бүтээе гээд хамтдаа анх хийж байсан.

–Энэ цуврал гарч байхад хоёр талтай байсан. “Буруу үлгэр дуурайл үзүүлж байна” гэсэн хэсэг байсан бол “Шинэ зүйл байна” гэж таатай хүлээн авсан ч хэсэг байсан. Энэ талын санал, шүүмжлэлийг уран бүтээлчийн хувьд хэрхэн хүлээн авсан. Ямар бодолтой байдаг вэ?

Миний хувьд дотроо хүндээр тусгаж авдаггүй. Зарим зүйл дээр ах, эгч нар “Хүүхдийн ёс суртахуунд муугаар нөлөөлнө” гэж байсан. Гэхдээ хүүхэд эцэг, эхийн тусгал байдаг учраас уг цувралыг үзээд, учиргүй зан ааш, ёс суртахуунд нь нөлөөлнө гэж бодохгүй байна.

 Би дунд, ахлах ангид байхдаа найзуудтайгаа энэ байтугай эротик кино их үздэг байсан. Хориглох тусам хүүхдүүд хайгаад олоод үзчихдэг. Эцэг эхчүүдийн мэдэхгүй зүйл маш их байдаг шүү дээ. Тиймээс үүн дээр санаа зовдоггүй. Надаас илүү санаа зовдог хүмүүс байдаг юм шиг байна лээ. Гэхдээ надад хамаагүй. “+17” цуврал маань миний амьдралыг, амьжиргааг дээшлүүлж, олны танил болгосон учраас энэ төсөлдөө юу юунаас илүү хайртай. Нэрийн хуудас, брэнд болсон анхны цуврал.

НАДАД “ХАВТАСТ ХЭРЭГ” КИНОНЫ РЕЦИДИВ ГЭМТ ХЭРЭГТНИЙ ДҮРД ТОГЛОХ САНАЛ ИРСЭН

–Жүжигчин Цогтоо гэхээр яагаад ч юм инээдтэй, хошин шогч байдал дүрслэгддэг л дээ. Та цаашдаа энэ төрлөөрөө уран бүтээлээ хийх үү? Эсвэл өөр дүрд тоглоё гэж боддог уу?

Манай үзэгчдийн соёл өөр. Солонгосын үзэгчдийн соёл өөр. Солонгосын жүжигчид мелодрам кинонд тоглоод, дараа нь комеди, тэгээд тулаантай кинонд тоглоод, хамаагүй хувираад явдаг. Харин манайд үзэгч тухайн жүжигчнийг анх яаж хүлээн авсан тэр дүрээр нь хүлээгээд авчихдаг. Хамгийн чухал нь үзэгчид. Үүнд тааруулаад, найруулагч нь ч гэсэн арга барилаа дагуулж явдаг гэж би ойлгодог.

Миний хувьд (Таргиад) жүжгийн фестивальд шагнал авч байсан болохоор хүнд эмгэнэлт сериозны дүрд өөрийгөө авьяастай гэж бодож байгаа (инээв). Хүмүүс сайн мэдэхгүй байх л даа. Инээдмийн төрөл хамгийн хүнддээ ордог. Бодлого байдаг. Үүний араас үзэгчдэд энийг хэлээд, араас нь үүнийг хэлбэл инээнэ гэсэн томьёо, бодлого шиг байдаг. Урлагийнхныг нийгмээсээ нэг алхам түрүүнд явдаг гэдэг шүү дээ. Тэрэн шиг түрүүлээд олж харсан зүйлээ хараагүй хүмүүст харуулдаг. Энэ бол комеди урлагийн үндсэн дүрэм. Манай хошин урлагийн мундаг том жүжигчид бүгд л драмын “Гэгээн Муза” шагнал авсан байдаг. Аглуу ах, Батаа ах Муза авсан. Буруу санаагүй бол Одноо эгч бас Муза авсан. “Солиот эх” киног үзэгчид мэдэж байгаа. Инээдмийн алдартай жүжигчин тэр таргиад, хүнд, сэтгэл зүйн драмын кинонд яаж тоглосон билээ.

  Тэгэхээр би өөрийгөө цаашдаа сэтгэл зүйн эсвэл тулаантай киноны эсрэг дүрд дүр бүтээх бүрэн бололцоотой гэж боддог. Үзэгчдэд хүртээл болчихсон л доо. Гэхдээ саяхан надад “Боловсрол” телевизээс “Хавтаст хэрэг” киноны рецидив гэмт хэрэгтний дүрд тоглох санал ирсэн. Гэвч надад тоглох боломж олдоогүй. Тэр үед би их баярласан. Бага насны хүүхдүүдийг хүчирхийлдэг дүр бол хэний ч санаанд оромгүй хүн байдаг гэж байгаа юм. Би бас тэгж боддог. Хэний ч санаанд ороогүй, хэн ч байдаг болохоор. Хүнийг таашгүй дээ. Тиймээс би өөрийгөө ямар ч рольд тоглох бүрэн боломжтой гэж боддог.

–Та юунаас болоод тоглож амжаагүй юм бэ?

“In Da House”-даа тоглосон. Солонгостой хамтран ажиллах байсан учраас зураг авалтаа долоодугаар сард хийнэ гээд шийдчихсэн байсан. Солонгосчуудын цаг нарийн, хэдийд ч өөрчлөгдөж магадгүй болохоор амжаагүй. Ерөнхийдөө завтай байсан. Гэхдээ солонгосчуудын гэнэтийн шийдвэр гарчхаж магадгүй гэдэг үүднээс тоглоогүй.

–Тэгэхээр та ямар дүрд тоглоё гэж боддог вэ?

Солонгосын нэг кинон дээр ингэж байгаа юм. Гаднаас хаалга нээгээд орж ирэхдээ аав маань уушгины өвчнөөр нас барж байсан. Ээжийгээ үхсэн, амьд эсэхийг мэдэхгүй. Би багаасаа ийм, тийм байсан гээд нүцгэн хүнийг дүүжилчихсэн, хутга гаргаж ирээд… Дүрийн танилцуулга нь тэгж явж байгаа байхгүй юу. Эсрэг дүрд сэтгэл зүйн траума авчихсан, эрүүл бус хүмүүс байгаа шүү дээ. Би өөрийгөө аль ч талын эсрэг дүрд тоглочих боломжтой гэж харж байна даа.

–Урлагийн салбарт шударга өрсөлдөөн хэр байна вэ. Патентын асуудал, бие биеэсээ хуулбарлах зэрэг асуудлыг та юу гэж боддог вэ?

Би 2012 оноос хойш урлагийн салбарт ажиллаж байна. Энэ хугацаанд нэг ч тийм асуудал гарч байгаагүй. Мэдээж Дэлхий дээр маш олон сэдэв байгаа. Үүн дээр санаа давхцах ч юм уу, тийм зүйл байгаа байх. “In Da House-1” киноны хувьд Солонгосын “Extreme job” гэдэг киноноос ерөнхий санаа авсан. Гэхдээ үүнд хулгайн план, сцень, дүрийн шугам байхгүй. Тэр гоё санааг монгол хөрсөн дээр монгол мөрдөгчид байсан бол яах байсан бол гэсэн санаагаар урлаж “In Da House” киногоо бүтээсэн. Тийм л асуудал гарч байсан. Бусдаар өөр асуудал гарч байгаагүй.

–Сүүлийн үед богино хэмжээний бичлэг хийж хандалт аваад үүний хажуугаар реклам хийдэг байдал ихэссэн. Та үүнийг юу гэж хардаг вэ? Урлагийн салбарын уран бүтээлч хүний хувьд зах зээл булаацалдах эсвэл ашиг хайх тал гэж хардаг уу?

Би 7-8 жилийн өмнө нэг судалгаа харж байсан. Үүн дээр 2030 он гэхэд бүх хүн влог хийдэг болно гэсэн байсан. Тухайн үед гайхаж байсан. Гэхдээ одоо бодохоор агаар нэг байна. Тэр хүний л ертөнц. Хүний эрхэнд хэн ч халдах эрхгүй. Хүн ямар аргаар талхаа, луувангаа зарна уу, надад хамаагүй. Уран бүтээлчийн хувьд мэргэжлийн хүний ажлаа хийхгүй, мэргэжлийн бус хандаад байвал өөр хэрэг. Гэхдээ үүнийг би биш, үзэгчид мэднэ. Миний хувьд тээртэй санагдах юм уу, энэ ийм шүү, тийм шүү гэж нэг ч удаа бодож байгаагүй. Би ч гэсэн өөрөө шаардлагатай байвал хийнэ. Гэхдээ хэн нэгнийг гутаан доромжлохгүй, хэн нэгний эрх ашигт халдахгүй хийхийг бодож байна. Би инээдмийн жүжигчин учраас тодорхой хэмжээнд нийгэмд үүрэг хүлээж байгаа. Тэр талаа л барьж явдаг. Тиймээс аль болох сөрөг зүйл хийхгүй байхыг боддог.

44 ИХ НАЯДЫН НҮҮРСНИЙ ХУЛГАЙГ ТӨРИЙН ЭРХ МЭДЭЛТНҮҮД ХҮЛЭЭН ЗӨВШӨӨРСӨН

– Танаас энэ талаар асуухгүй өнгөрөөж болохгүй байх. Та 2023 онд 44 их наядын нүүрсний хулгайн асуудлаар талбай дээр жагсаж, үзэл бодлоо илэрхийлсэн. “Дарамт, шахалт ирлээ. Мэдүүлэг өгч байна” гээд тухайн үед нэлээн юм болсон шүү дээ.

Санаж байна л даа. Яг 12 дугаар сарын 4-21 хүртэл жагссан. Тухайн үед жагсаж байхдаа бичсэн пост бүрийнхээ тоогоор байцаалт өгсөн. Би тэрэнд маш их гомдож явдаг. Яах вэ, гомдоогүй юм шиг царайлж байгаа ч миний дотор нууцхан гуниг бий. 44 их наядыг хулгайлсан нь үнэн. Хамсаатнууд нь Хятадад цаазлуулсан нь үнэн. Хятадын талаас Монголын Засгийн газарт албан бичиг өгсөн нь үнэн. Манай улсын Төрийн тэргүүн, Ерөнхий сайд, УИХ-ын дарга үүнийг нууцад оруулсан нь үнэн. Яагаад үнэн бэ гэвэл би тухайн үед Засгийн газрын Хэрэг эрхлэх газрын дарга байсан Д.Амарбаясгалан, Хууль зүйн сайд Х.Нямбаатартай нүүр нүүрээ харж, нэг алхмын зайтай уулзаж ярилцсан. Тэгэхэд 40 их наядыг хулгайлаагүй, 10 их наядыг л хулгайлсан гэх тоон баримт, ярилцлагыг 3-4 цагийн хооронд хийсэн.

   Би “Энэ их мөнгийг хулгайлсан эздийг олоод өгөөч” гэж хүссэн. 17 хүний нэр зарласан. Тэр 17 хүнд ямар ч арга хэмжээ аваагүй. Ерөнхийлөгч, Ерөнхий сайд хэн нэгнээр дамжуулаад, надтай уулзъя гэсэн би уулзаагүй. Мөн маш олон УИХ-ын гишүүд, нөлөө бүхий хүмүүс уулзъя гэсэн. Би нэгэнтэй нь ч уулзаагүй. Гэсэн хэдий ч би бүтэн улирал байцаагдаж, маш их цаг хугацаа зориулсан. Надад хэцүү байсан. Тухайн үед үнэхээр ганцаардсан. Ганцаардал гэж юу вэ гэдгийг ясандаа тултал мэдрээд, монгол хүний адгийн араншинг би ойлгож авсан. Миний пост тэр үед хэдэн зуун мянган лаиктай, хүчтэй байлаа. Тэгж хүмүүс намайг өргөмжилсөн. Гэлээ ч эцэст нь намайг дэвсэлсэн. Хятадын эрлийз болгосонд маш муухай санагддаг. Засгийн газрын тэргүүн, магадгүй Төрийн тэргүүн, нууцад оруулсан эрх мэдэлтнүүд миний эсрэг баг ажиллуулж, миний нэр төр, бүх зүйлийг гутаан доромжилж, Хятадын эрлийз, хурлийз, хэн нэгнээс санхүүжсэн болгож, нийгэмд хэвлэл мэдээллийн хэрэгсэл, саитуудаар дамжуулж харлуулсан. Би гарсан мэдээ болгонтой тэмцэж чадахгүй. Би эхнэр, хүүхдүүдийнхээ тайван амьдралыг бодоод, дуугаа хурааснаас биш, үзэл бодол минь хэвээрээ байгаа.

Одоогийн Засгийн газрын тэргүүн “Ард түмэнтэйгээ хамт тэмцмээр байна” гэсэн. Би итгээд л очсон. Тэгэхэд гарч ирээгүй шүү дээ. Нэрсийг зарла, хариуцлага тооц  гэсэн шаардлагад ямар ч арга хэмжээ аваагүй. Би үүнд маш их харамсаж явдаг. Магадгүй шударга ёсны салхи салхилаад, төр дүрэм журамдаа орохын цагт миний нэр төрийг цайруулж өгөөсэй гэж дотроо хүсдэг.

Хэрэв би хэн нэгнээс мөнгө авсан бол үүнийг илрүүлж чадахгүй дүүрэг, дүүргийн байцаагч гэж байхгүй юм билээ. Би эрүүгийн цагдаа, тагнуул ямар гайхамшигтай төгс ажилладгийг улирал байцаагдахдаа мэдэрсэн. Би хэн нэгнээс 1000 төгрөг авсан бол үүнийг ямар ч мөрдөн байцаагч илрүүлчих юм байна лээ.

БИ ХЭНЭЭС Ч МӨНГӨ АВААГҮЙ, СОНГУУЛИЙН АЖЛЫН ЦАЛИН 100 САЯ ТӨГРӨГ Л АВСАН

Тэртээх 2-3 жилийн өмнөх Сонгинохайрхан дүүрэг дээр сонгуулийн 28 удаагийн хурлыг би хөтөлж ажилласан. Жижгээ ах бид хоёр хийсэн л дээ. Бид хоёрын цалин 100 сая төгрөг байсан. Үүнтэй хамаатуулж, хүмүүс буруу зөрүү ойлгоод байдаг юм билээ. Би маш бага мөнгө авсан байна гэж боддог. Бага мөнгө шүү. Яагаад гэвэл тухайн үед улс төрийн мэдлэг байгаагүйгээс болж, хуулийн хүрээнд нь ажиллавал эргээд буруудахгүй байх гэсэн бодолтой байсан болохоос биш, намайг нүүрсний тэмцэл хийж байх үед нүүрсний хулгайч нарыг өмгөөлж хамгаалагч байдлаар надад хандсанд харамсдаг. Би үүнийг үйлийн үр л гэж ойлгодог. Одоо би улстөрч гэж хэн бэ, хэн нь хэн бэ гэдгийг ялгах тэнхэлтэй болсон. Хүнийг хүн чанараар нь ялгах тэнхэлтэй болсондоо өөртөө баярладаг. Намайг талбай дээр байхад 100 сая төгрөг авсан гэж хэн нэгэнд хэлсэн. Гэхдээ тэр жагсаал биш гэдгийг сайн ойлгоосой гэж хүсэж байна. Хэрвээ жагсаалаас мөнгө авсан бол тэгж их байцаагдахдаа намайг хорих шиг амар юм байхгүй байсан байх.

Би жагсаалтай холбоотой нэг зүйл хэлмээр байдаг юм. Үүн дээр албан бичиг өгсөн хүн хэн юм бэ? Би өөрөө Ерөнхий сайдын зөвлөх Анхзаяа бил үү, тэр бүсгүйд өгч байснаа санадаг байхгүй юу. Үүний маргааш Их хурал авлига, албан тушаалын хуульд яаралтай өөрчлөлт оруулж, зассан юм. Хүмүүс миний мууг л ярина уу гэхээс сайныг ярихгүй байгаа биз дээ. Хуулийг эмх цэгцэд оруулж өгч, янзалж өгсөн эгчийг маань сар хүйтэн шоронд хорьсон байдаг юм. Эгчийн маань шүүх хурал болох байх даа гээд жил хүлээсэн. Болоогүй. Монголд шүүх хурал болдоггүй мөртлөө хүнийг хүйтэн шоронд хорьдог дарангуйлал тогтчихсон. Тухайн үед үг хэлэх эрх чөлөө байхгүй боллоо гэж их гомдсон. Олон удаа байцагдахдаа цаагуураа миний үг, үйлдлийг маань хорьж байгаа хэлбэр байсан. Би үнэхээр шантарсан. Ний нуугүй хэлэхэд ганцаардсан. Миний дэргэд хэн ч байгаагүй. Зөвхөн гэр бүл маань л байсан. Өөр хэн ч байгаагүй.

–Монголчууд ер нь жагсаж чаддаг юм уу?

Би өмнө нь жагсаж үзээгүй. Жагсаж байхдаа нэг зүйл ойлгосон нь урьд урьдын жагсаалууд бүгд тавилттай жүжиг байсан гэдгийг анзаарсан. Ерөнхий сайд суудлаа өгдөг таавчиктай жагсаалаас гадна өөр жагсаалууд тавилттай байсан гэдгийг ойлгосон. Мөн намайг жагсаж байхад “Шүүгчид буруутай” гээд уриа лоозон барьсан хэсэг залуус талбайн хажуугаас зохион байгуулалттай нэгэн жигд орж ирснийг би санадаг юм. Олон хоног байсан болохоор ямар хүмүүс хамт байлаа гэдгээ би мэдэж байгаа. Одоо намайг элдвээр хэлж “Чи тэмцэж чадаагүй шүү” гэж хэлж байгаа хүмүүсийн фейсбүүк рүү ороод харахад хэзээ ч хараагүй хүн л байдаг. Яагаад олон хоног жагссан бэ гэвэл маш олон гадаадын хүмүүсийн хандив, туслалцаа байсан. Тэр хүмүүсийн сэтгэлийн дэм, настай хүмүүсийн халуун аарц, хуушуур, сайхан сэтгэлээр олон хоног жагссан байх. Ер нь монголчууд тэмцдэг ард түмэн биш юм шиг байна лээ. Солонгост очих болгонд л жагсаал болж байгаа байхгүй юу. Солонгос шиг тэмцэж чаддаг бол сайхан байна. Ерөнхийлөгчдөө хариуцлага тооцоод буулгадаг, байранд нь тавьдаг ард түмэн бол сайхан юм. Даанч манайхан утасны цаанаас тэмцэнэ үү гэхээс талбай дээр ирэх нь хэд билээ.

МОНГОЛЧУУД ТЭМЦДЭГ АРД ТҮМЭН БИШ. ЖАГСАЖ БАЙХДАА ХЭН НЬ ХЭН БЭ? ГЭДГИЙГ МЭДЭРСЭН

Сүүлд утааны эсрэг Ч.Ганжавхлан жагсаж байхаар нь тэр хүнийг ойлгосон. Би тэр хүнийг ямар хүн гэдгийг мэдэхгүй л дээ. Гэхдээ халитхан ярилцахад итгэмээр санагдах хүн гэж байдаг. Би бол Ч.Ганжавхланд итгэсэн. Энэ хүн утааны эсрэг чин сэтгэлээсээ жагсаж байна гэж бодсон. Тэр хүнтэй холбоотой пост хийсэн чинь Цагдаагийн ерөнхий газраас намайг дуудсан. Надад дахиж байцаагдаад явах цаг зав байхгүй. Бараг траума болчихсон шүү дээ. Дахиад цагдаагийн газраар орсон чинь хэцүү байна лээ. Тэгээд “Ер нь яршиг даа, больё” гэж бодсон. Өмнө нь би сошиалд “Одоогийн Ерөнхийлөгч, Ерөнхий сайд 2 хамгийн богино онигоо. Яагаад гэвэл тэр хоёр байгаа нь л инээдэм байхгүй юу” гэснийг шэйр хийсэн чинь миний ажлын холбогдолтой удирдлагын том хүн над руу яриад “Болиоч” гээд л мөн хамаатан саднуудын өндөр албан тушаалтай хүмүүс бас “Болиоч ээ” гээд залгаад байна лээ. Надад ядаргаатай санагдаж байгаа байхгүй юу. Ерөнхийлөгч, Ерөнхий сайдаа шүүмжлэхэд л дарамт ирж байна шүү дээ.

Нэг юм хэлэхэд, тухайн үед намайг жагсаж байхад Хөдөлмөрийн баатар, жүжигчний анги даасан багш Д.Цэрэндагва “Хүү минь, багш нь чамаар бахархаж байна” гэж утсаар ярьсан. Багшийнхаа үгийг сонсоод, маргааш ахиад тэмцэх эрч хүчтэй байлаа. Мөн манай “Эмоци” продакшны гүйцэтгэх захирал Тэмка ах “Зөв шүү миний дүү, тултал тэмцээрэй” гэж хэлсэн.

–Та үр хүүхдэдээ их цаг зав зарцуулахыг эрмэлздэг шиг санагдсан. Өөрөө ч бас дурдаж байсан.

     Би гуравдугаар ангид байхдаа аавыгаа алдаад, аавын хайрыг бүрэн дүүрэн аваагүй болохоор үр хүүхдүүдээ хэзээ ч аавын хайраар дутаахгүй гэж, амьдралынхаа үнэ цэнээ болгосон. Насан өндөр болоод, өөд болохдоо бахархал дүүрэн, жаргалтай өөд болох юмсан гэж боддог. Үхэхдээ би үхэж байна гэж бодохгүй, “Миний үргэлжлэл болсон хүүхдүүд минь бий. Би амьд байгаа” гэж бодон, өөрийгөө үлдээх болохоор үр хүүхдүүддээ цаг зориулж байхыг боддог. Мөн аавын хайрыг бүрэн дүүрэн мэдрээгүй болохоор ханьдаа бүрэн дүүрэн хайраа гаргаж чаддаггүй юм шиг байна лээ. Тиймээс үүн дээр анхаарч, эцгийн хайр, ханийн хайрыг дутаахгүй, хариуцлагатай байх нь нэгдүгээрт байдаг. Зарим уран бүтээлчийг харахад гэр бүлийнхэнтэйгээ муухай харьцчихаад ажлын хүмүүстэйгээ гоё харьцаад байдаг юм билээ. “Өө сайн байна уу, та. Ийшээ суу” гээд соёлтой хэлдэг. Тэгснээ эхнэртээ “За за, чи тэгсэн биз дээ” гээд л. Үүний байрыг солимоор байгаа байхгүй юу. Эхнэртээ хүндлэлтэй харьцаад, ажлын хүнтэйгээ нэг удаа тэгж харьцсан байхад яах вэ дээ. Гэр бүл насаараа хамт байх болохоор үүн дээр эмзэг, хайнга хандахгүй байх юм сан гэж хичээдэг. Хүмүүсийг ч бас тийм байгаасай гэж хүсдэг.

ЭХНЭРЭЭСЭЭ САЛААГҮЙ, БИД ХОЁР ХАМТДАА БАЙГАА

–Олны танил хүний хувийн амьдралыг олон нийт их сонирхдог. Таны оруулсан пост, бичлэгүүд дээр “Эхнэр нь харагдахгүй байна. Салсан юм уу” гэх зэрэг коммент байсан.

Эхнэр маань ажилд ороод нэг жил болж байна. Манай эхнэр жил зургаан сарын зайтай 3 хүүхэд төрүүлсэн. Хүүхэд төрүүлэх, харах ямар билээ гэдгийг бүх эмэгтэй хүмүүс, ээжүүд сайн мэдэж байгаа шүү дээ. Хүүхэд төрүүлээд 5 жил гэртээ харсан хүн ямар байдалтай байх уу. Та нар бод доо. Ер нь төсөөл л дөө.

Өмнө нь бид хоёр сошиал дээр, тик ток дээр бичлэг, рийл байнга хийдэг байсан. Нүүрсний жагсаалаас хойш хийхээ больсон. Бүгдийг ил байлгана гэдэг аюултай юм шиг санагдсан.

Би эхнэрээ хамт олонтой, өөрийн гэсэн карьертай, өөрийн гэсэн зүйлээ бий болгосон, бардам эмэгтэй байгаасай гэж хүссэн. Бид хоёр саяхан хамт кино үзээд, романтиклаад, талбайн хажуугаар бүжиглээд л гэртээ харилаа. Хүмүүс яагаад тэгж хэлээд байгааг би ойлгохгүй байна. Нэг бодлын санаа зовж байгаад нь баярлалаа гэж хэлэх юм даа. Ярилцлага өгч байхад эхнэр маань байн байн залгаад байна. Надад санаа зовоод, оройтоод яаж байгаа юм бол гэж бодож байгаа даа.

–Тэгэхээр хоёр тийшээ болсон асуудал байхгүй гэсэн үг үү?

Байхгүй. Манай эхнэрийг зүгээр байлгадаггүй юм гэсэн. Ялангуяа эмэгтэй хүмүүс “Чи нөхрөө хаясан биз дээ” гэдэг гэсэн. Гурвын гурван хүүхэдтэй эмэгтэй хүн яаж орхиж явах юм бэ. Хүмүүсийн оюун ухаанд яаж тийм юм буугаад байгааг гайхаад байгаа юм. “Эхнэр чинь хаясан гэсэн үү? Үнэн үү” л гэнэ. Чаатаар ийм асуулт маш их ирнэ. Тэр болгонд хариулах зав байхгүй шүү дээ.