Азийн номер нэг DJ, Дэлхийн хэмжээний нөлөөлөгч DJ Soda 3-р сарын 15-нд “Аса-Арена”-д монгол үзэгч фенүүдтэйгээ хоёр дахь удаагаа гал гарсан шоу тоглолтоор уулзах гэж байна. Электрон хөгжмийн хатан хаан гэгдэх түүний ярилцлагыг Time.mn сайт хүргэж байна.
Та хэзээнээс DJ хийж, загвар өмсөж эхэлсэн бэ. Цаашид та өөрийгөө юугаар сорихоор төлөвлөж байна вэ?
Үнэндээ би DJ хийж, загварын ертөнцөд орсноос хойш нэлээд хугацаа өнгөрчээ. DJ-гээр ойролцоогоор 12 жил, загвар өмсөгчөөр 14 жил ажиллаж байна. Ер нь би өөрийгөө сорих дуртай. Энэ нь ч надад сонирхолтой байдаг. Өдөр бүр хичээн ажиллаж байна.
Таны хамгийн сайхан болон хамгийн сэтгэл дундуур болсон тоглолтынхоо тухай яривал?
Хамгийн гайхалтай зүйл нь үзэгчид миний дуулсан дууг даган дуулж, хөгжмийг сэтгэлээрээ мэдэрч байгаа нь гоё санагддаг. Нэг тоглолт дээр фэн охид маань яг миний бүжгийн хэв маягаар хамт бүжиглэсэн. Тэр тоглолтыг би мартдаггүй. Надад маш гайхалтай мэдрэмж төрүүлсэн. Харин хамгийн таагүй нэг жишээ гэвэл согтуу хүн тайзан дээр гарч ирээд, тоглолтыг минь үймүүлэхийг хүссэн явдал. Түүнээс гадна би тайзан дээр тоглож байхдаа хэн нэгний шидсэн чулуунд оногдож, нүүрэндээ гэмтэл авч байсан.
Хэрвээ та сонголт хийх шаардлагатай бол ямар мэргэжлээр ажиллах вэ. DJ хийх үү эсвэл өөр зүйл үү?
Би DJ мэргэжилдээ маш их хайртай. Амьдралаа хөгжимгүйгээр төсөөлж ч чадахгүй. Хэрвээ дахин сонголт хийх шаардлагатай бол яах аргагүй л DJ-г сонгоно. Хэрвээ үнэхээр DJ болохгүй байсан бол би дуу хөгжмийн салбарт ажиллах байсан болов уу. Тийм ээ, би итгэлтэй байна.
Та сонсох дуртай 3 дуугаа нэрлээч?
Roosevelt-ийн “Strangers”, HVME-ийн “Goosebumps”, мөн Bad Bunny & Jhay Cortez-ийн “DAKITI” дуунуудыг би сонсох дуртай.
Таныг Азийн хатан хаан №1 DJ, эсвэл Дэлхийн шилдэг эмэгтэй DJ нарын нэг гэж дуудах үед ямар мэдрэмж төрдөг вэ?
Миний хөгжмийг хайрлаж, дэмждэг фенүүд болон сонсогчдодоо би үнэхээр талархаж явдаг. Миний хөгжим, бүтээлүүдийг хүлээж байдаг маш олон үнэнч фэнүүд бий. Эсрэгээрээ бас сонсох дургүй хүмүүс ч байгаа байх. Тиймээс би үргэлж өөрийгөө хөгжүүлж, шүтэн бишрэгчдэдээ илүү сайхан төрхөө харуулж, хөгжим болон бусад контентоороо дамжуулан Дэлхий даяарх хүмүүстэй холбогдохыг хичээж байна. Зогсолтгүй хөдөлмөрлөх гэсэн үг л дээ.
2025 онд таны ажлын төлөвлөгөө болон DJ SODA-гийн хувьд дараагийн алхам юу вэ?
Би 2025 онд өөрийгөө шинээр сорьж, өндөр чанартай олон сайхан уран бүтээл гаргахад бэлэн байна. Та бүхэн энэ жил ч гэсэн намайг анхааралтай ажиглаж, дэмжиж байгаарай! Та бүхний үзүүлж буй асар их хайр, дэмжлэгт маш их талархаж байна.