Нийгмийн сүлжээний Х платформыг эзэмшигч Элон Маск тухайн платформ “томоохон кибер халдлагад” өртсөн тухай мэдэгджээ.
Түүний хэлснээр дээрх халдлага нь “Украин улсын орчмын” IP хаягуудын оролцоотой байсан гэжээ.
Интернет үйлчилгээний тасалдлыг хянадаг вебсайтын мэдээлснээр Х платформын хэрэглэгчид даваа гарагийн өглөөнөөс эхлэн тус платформд холбогдож, нэвтрэн орж чадахгүй байгаа гэнэ.
Харин АНУ-ын хэвлэл мэдээллийн хэрэгслүүдийн мэдээлснээр Х платформд үүсээд байгаа энэхүү асуудал нь техникийн саатлаас үүдэлтэй хэмээн мэдээлсэн байна.
Тэгвэл Элон Маск энэхүү саатлыг тус платформын эсрэг үйлдсэн томоохон кибер халдлагатай холбон тайлбарлаж, X платформын эсрэг кибер халдлага дайралт үргэлжилсээр байгаа гэдгийг тодотгожээ.
Тэрээр хэлэхдээ, “бид өдөр бүр халдлагад өртөж байдаг, гэхдээ энэ удаагийн халдлагыг маш олон тооны эх үүсвэрээс үйлдэж байна, нэг бол маш том зохион байгуулалттай бүлэглэл, эсвэл бүр улс орны оролцоо байгаа” гэсэн байна.
Элон Маск даваа гарагт Fox Business нэвтрүүлэгт өгсөн ярилцлагадаа Х платформын системийг унагааж, зогсоох гэсэн томоохон кибер халдлагыг Украин улсаас гаралтай IP хаягуудаас үйлдэж байна хэмээн ярьжээ.
Харин Bloomberg агентлагийн зүгээс палестины мэргэжлийн хакеруудын Dark Storm хэмээх бүлэглэлийн зүгээс өөрсдийгөө Х платформын эсрэг дээрх халдлагыг үйлдсэн хэмээн Telegram хуудсандаа бичсэн талаар мэдээлсэн байна.