Байгаль орчин, уур амьсгалын өөрчлөлтийн яамны Салбарын хяналтын газар энэ оноос байгалийн орчны зөрчлийн мэдээлэл хүлээн авах 117 тусгай дугаар ажиллуулж эхэлсэн. Тус дугаарт 2 дугаар сард 10 гаруй дуудлага, мэдээлэл ирсэн байна. Тухайлбал: Сэлэнгэ аймгийн Баянгол сумын Нарангийн голын ай савд сав газрын урсац, голын голдирлыг өөрчлөн, алт ухаж байгаа асуудлаар хэд хэдэн иргэн 117 дугаарт ханджээ.

Сэлэнгэ аймгийн Мандал, Түнхэл сумын иргэд, аж ахуйн нэгж ойгоос мод бэлтгэх журмыг цуцалсантай холбогдуулан, мод бэлтгэх үйл ажиллагаа зогссон тул хууль эрх зүйн зохицуулалтыг яаралтай шийдвэрлэхийг хүсжээ. Төв аймгийн Баянчандмань сумын Эрдэнэ багийн Жимбэгэрийн амны ойд газар олгосон, ойг хашсан гэх гомдол, мэдээллүүдийг бүртгэн авч, шалган шийдвэрлэхээр ажиллаж байна. 

Байгаль орчныг хамгаалах тухай хуулийн 54 дүгээр зүйлд байгаль орчны эсрэг хууль бус үйлдлийг илрүүлсэн байгаль хамгаалагч, мэдээлсэн иргэнд урамшуулал олгохоор заасан байдаг. Хууль бусаар бэлтгэсэн байгалийн баялгийг хураан авч, борлуулаад, орлогын 15 хувийг тухайн зөрчлийг илрүүлсэн улсын байцаагч, байгаль хамгаалагчид олгодог. Хууль тогтоомж зөрчсөн тухай үнэн бодит мэдээллийг эрх бүхий байгууллага, албан тушаалтанд өгсөн иргэн, нөхөрлөл, төрийн бус байгууллагад 150.000 төгрөгөөр урамшуулдаг юм байна.