Өнгөрсөн сард БНСУ-ын Дэжон хотын бага сургуулийн нэгдүгээр ангийн сурагч Ким Ха Нуэлыг хутгалж хөнөөсөн багш хэн болохыг олон нийтэд ил болголоо. Багшийг Мён Жэ Ван гэдэг бөгөөд 48 настай аж.

Дэжон хотын Цагдаагийн газрын мэдээлснээр Хувийн мэдээлэл задруулах комисс 3 дугаар сарын 11-нд хуралдаж, уг хэргийн онц хэрцгий байдал, хохирлын хэмжээ, хохирогчийн ар гэрийнхний санаа бодлыг харгалзан үзээд, сэжигтний нэр, нас, гэрэл зургийг олон нийтэд ил болгохоор болсон байна.

3 дугаар 12-нд цагдаа нар “Мэдээллийг нь задруулахыг Мён эсэргүүцээгүй гэж мэдэгдсэн тул өнөөдрөөс 4 дүгээр сарын 11 хүртэл Дэжон хотын Цагдаагийн вэбсаитад түүний хувийн мэдээллийг нийтлэх болно” гэж мэдээлжээ.

Хэргийг эргэн сануулахад, Мён Жэ Ван багш 2 дугаар сарын 10-ны 17:50 цагийн орчимд дугуйлангаасаа ганцаараа гарч явсан сурагч Ким Ха Нуэлийг кампус дахь дуу, дүрсний өрөөнд оруулан, хутгалж, хөнөөсөн юм. Мён гэмт хэрэг үйлдсэн даруйдаа хүзүү, гараа хутгалж, өөрийгөө гэмтээхийг завдсан тул эмнэлэгт хэвтэн эмчлүүлжээ.

Цагдаад байцаагдахдаа Мён Жэ Ван ихэнх хэргээ хүлээн зөвшөөрсөн гэж Цагдаагийн газар мэдээлжээ. Сэтгэлийн хямралд орж, олон удаа эмнэлгийн хуудас авч байсан тэрээр ажилдаа буцаж ирээд, гуравхан хоногийн дараа өвчин нь сэдэрч, ийм хэрэг үйлджээ.