Жүжигчин Ким Сүн Хёны агентлаг талийгаач жүжигчин Ким Сэ Ронтой урьд нь харилцаатай байсан гэх маргаан үүсээд байгаатай холбогдуулан албан ёсны мэдэгдэл гаргана гэж пүрэв гарагт мэдэгдэв.

Шинэ захидал, гэрэл зураг

Ким Сэ Роны гэр бүлийнхэн тэднийг романтик харилцаатай байсан гэж мэдэгдсээр байгаа бөгөөд шинээр ил болсон захидал, гэрэл зураг нь Ким Сүн Хён, Ким Сэ Ро нарын эргэн тойронд өрнөж буй маргааныг улам бүр дэвэргэсэн байна. Лхагва гарагт Ким Сэ Роны гэр бүлийнхэн Ким Сүн Хён цэргийн алба хааж байхдаа түүнд бичсэн захидлыг мөн жүжигчин бүсгүйн хацар дээр үнсэж буй өөр гэрэл зургийн хамт олонд дэлгэжээ. Уг мэдээллийг YouTube-ийн Hoverlab сувгаар дамжуулан нийтэлсэн байна.

Уг захидалд тэдний бүтэн нэр байхгүй ч Ким Сэ Роны хоч болох “Саеро Неро”-д гэж хаягласан байх бөгөөд “Алсаас ирсэн Ким” гэсэн гарын үсэгтэй байсан нь уг захидлыг жүжигчин Ким Сүн Хён илгээсэн гэх таамаглалыг улам бүр төрүүлж байна. 2018 оны 6 дугаар сарын 9-ний өдрийн захидалд цэргийн амьдралын талаар дэлгэрэнгүй тайлбарласан бөгөөд “Саеро Нерогийн тухай бодоход сайхан өдөр байна”, “Би чамайг санаж байна “, “Би чадах бүхнээ хийх болно” гэх мэт өгүүлбэр багтжээ.

Ким Сүн Хён 2017 оны аравдугаар сараас 2019 оны долдугаар сар хүртэл цэргийн алба хаасан. Мөн гэр бүлийнхэн нь өмнө нь харж байгаагүй гэрэл зургууд, тэр дундаа Ким Сүн Хёныг Ким Сэ Роны хацар дээр үнсэж буй сельфи зэрэг зургуудыг нийтэлсэн нь тэдний хайр дурлалын харилцаатай байсан гэх мэдээллийг улам бататгаж байна. Ким Сэ Роны авга эгч тэр хоёрыг бүр гэрлэх тухай ч ярилцдаг байсан гэж хэлсэн байна.

Ким Сэ Рон 2000 онд төрсөн бол Ким Сүн Хён 1988 онд төрсөн. Харин Ким Сүн Хёны “Gold medalist ” агентлаг уг мэдэгдлийг эрс няцааж, “үндэслэлгүй худал мэдээлэл” гэж нэрлээд, “хамгийн хүчтэй хуулийн хариу арга хэмжээ” авахаар бэлтгэж байгаагаа мэдэгдэв. Агентлаг хэдий няцаасан ч нэмэлт мэдээлэл зураг олон нийтэд цацагдсаар байгаа нь таамаглалыг улам бүр нэмэгдүүлж байна.