<p><br>Хүний амьдралын утга учир, аз жаргал юунд оршдог вэ гэж хэн нэгэн надаас асуувал, гэр бүлийн халуун дулаан уур амьсгал, элэг бүтэн амьдралд оршдог гэж би хариулна аа. Хүний орчлонг онож төрсний нэг учир, хайрлахыг, хайрлуулахыг мэдрэхийн илэрхийлэл гэр бүл шүү дээ. Ийн бичихийн учир хүргэнээ эрэн бидэнтэй холбогдсон хадам ээжтэй холбоотой юм.</p> <p>Хоёр давхар эрээн байшингийн үүдээр ороход, цагаан цамцтай 50 эргэм насны эмэгтэй биднийг угтав. Тэрээр саажилттай болсон зээгээ эмчлүүлэхээр Хүүхдийн сэргээн засах төвд хэвтэж байгаа аж. “Манайх гэдэг айл саад тотгоргүй, өвчин зовлонгүй, элэг бүтэн гэр бүл байсан” хэмээн бидний яриа эхэллээ. “Эгч нь хүү, охин хоёртой. Ганц охин минь бусдын адил хадамд гарч, хүний хань болсон. Гэвч охины минь амьдрал удаан үргэлжлээгүй. Нэг л өдөр хоёрын хоёр саажилттай хүүхэд асрах хатуухан тавилан нөхөр бид хоёрт тохиосон” гэж тэр яриагаа үргэлжлүүллээ.</p> <p>Түүний охин төрөхийн хожуу үеийн хордлогоос болоод, цус харважээ. Охин нь ийн саажилттай болсон байна. Хэвлийд нь байсан үр нь давхар саажилттай болсон аж. Гэвч тэдний зовлон үүгээр дууссангүй. Хайрлана, халамжилна гэж газар дээрх ганц охинтой нь ханилсан залуу саажилттай болсон хойно нь хаяад явжээ. “Дэлгүүр яваад, сүү аваад ирье” гэж гараад, усанд хаясан чулуу шиг алга болсон. Саажилттай болсон охин, зээ хоёроо эмчлүүлэхийн сацуу хүргэн болох хүний банкнаас авсан 40 сая төгрөгийн өрийг төлж байгаа. Зээл авснаасаа хойш нэг ч удаа төлөөгүй байсан” хэмээн эхэр татан уйлах ээжийг би хараад нулимсаа барж дийлсэнгүй. </p> <blockquote class="wp-block-quote is-layout-flow wp-block-quote-is-layout-flow"> <p>Нүдээр хараагүй л бол дайн байсан ч итгэдэггүй надад ар араасаа тохиосон гачлант түүхийг сонсох хэцүү байлаа. Хүргэндээ гомдсон тэр эхийн уйлан ярьсан өгүүлбэр болгон зүрхэнд хүнд тусав. Тэр өдөржингөө “Ханиа л зөв сонгоорой” гэх үг нь толгойноос гарсангүй.</p> </blockquote> <p>Сүүлийн үед ийм жишээ их сонсогдох болсон. Манайхан ч бүр дасан зохицоод амьдарчхаж байх шиг. Ёстой л өөрт нь тохиолдоогүй л бол яах вэ гээд орхидог болж дээ. Угаасаа ингэдэг юм гээд хамаг ачаагаа нуруундаа үүрээд явчихдаг эмэгтэйчүүд ч байна. Яая даа. Эгчийн хэлдгээр нэг сайн хууль батлаад, хашраагаад өгөөсэй гэж боддог боллоо.</p> <p> Хүн хөгширсөн хойно хажууд нь түших хүн ханиас нь өөр байдаггүй гэдэг юм билээ. Нээрээ л эцэг, эх хорвоогийн жамаар одож, ах дүүс тус тусын амьдралаа хөөн, үр хүүхэд гэрлээд явчихна. Эцэст хүний хань л хажууд үлдэнэ шүү дээ. Жаахан л хариуцлагатай, тэвчээртэй, нэгэндээ хайртай байвал…<br>Эгчтэй ярилцаж дуусаад гарахдаа тэр хүргэнд нь яг л тэр эгчийн адил гомдож, үзэн ядаж байлаа. Хэзээ нэг өдөр тэд үйлийнхээ үрийг эдлэх л байх. Магадгүй үхэл тэдэнд ухаарал болох байх.</p>