Apple компани өнгөрсөн 1-р сард iPhone утасны цувралдаа “Air” хэмээх шинэ загварыг нэмэхээр болсноо зарласан бол ирэх намар iPhone 17 Air хэмээх шинэ загварын утсыг худалдаанд гаргахаар болсон талаар технологийн салбарын мэдээллийн вебсайтууд мэдээллээд байна.

iPhone 17 Air загварын ухаалаг гар утас нь MacBook Air нөүтбүүктэй ижил маш нимгэхэн загвартай байх бөгөөд мөн хамгийн анхны port-free буюу ямар ч биет холбогч ашигладаггүй, wireless байдлаар цэнэглэж, бүх дата файлуудаа үүлэн тооцоолуураас хуулах байдлаар хийгдэх тухай мэдээлэл гарчээ.

Гэхдээ бүх цахилгаан хэрэгслүүд USB-C гэсэн ганцхан төрлийн цэнэглэгч ашиглах тухай Европын Холбооны шинэ дүрэм журмын дагуу Европын зах зээлээс шалтгаалан одоогийн байдлаар Apple компани iPhone 17 Air утсыг USB-C цэнэглэгчтэй үйлдвэрлэх магадлалтай байгаа гэнэ.

Зарим технологийн сайтуудаар мөн iPhone 17 загварын шинэ ухаалаг гар утаснуудын жишээ загвар бүхий хийцийн зургуудыг олон нийтэд дэлгээд байна. Урд, ард, хажуу талаас нь харуулсан зургууд дээр iPhone 17 Air загвар 6.6-6.9 инчийн хооронд хийгдэж магадгүй гэсэн таамагтай бараг дүйцэж байгаа ажээ.

Түүнчлэн iPhone 17 Air загварын ухаалаг утас нь 5.5 мм нимгэн, iPhone 16E загвартай ижил ар талдаа ганцхан камертай хийгдэх ба 120Hz ProMotion дэлгэцтэй, Apple A19 чиптэй, нимгэн загвартай хэдий ч баттерей нь бусад iPhone утаснуудтай ижил хүчтэй байх болно гэж мэдээлж байна.

Ирэх намар ойролцоогоор 900 ам.долларын үнээр худалдаанд гарах iPhone 17 Air загварын дараагaар Apple компани Samsung Galaxy Z Fold-той ижил анхны нугардаг загвартай утсаа 2026 онд гаргах мэдээлэл мөн гараад байна.