Сансрын технологийн SpaceX компанийг үүсгэн байгуулагч, тэрбумтан Элон Маск ирэх оны сүүлээр Ангараг гарагийг зорих Starship хөлгийн аяллыг эхлүүлэх болно хэмээн мэдэгдсэн байна.
Тэрээр өөрийн эзэмшдэг Х платформд оруулсан нийтлэлдээ мөн “хэрвээ анхны аялал амжилттай болвол 2029 оноос эхлэн Ангараг гараг дээр хүн буулгах болно, гэхдээ бидний тооцоогоор 2031 онд л Ангараг гараг дээр хүн буулгах болов уу” хэмээн бичжээ.
SpaceX компанийн Starship хөлөг нь 123 метр өндөр бөгөөд хүн төрөлхтний түүхэнд бүтээсэн хамгийн том хэмжээтэй пуужин юм. Дахин ашиглах боломжтой тус пуужингийн анхны туршилтын нислэг 2023 оны 4-р сарын 20-ний өдөр явагдаж, амжилттай хөөрч сансарт гарч байсан бол тус хөлгийн энэ оны эхээр хийгдсэн туршилтууд бүтэлгүйтээд байгаа билээ.
Өнгөрсөн 1-р сарын туршилтын нислэгийн үеэр пуужин дэлбэрсэн бол өнгөрсөн долоо хоногт Техас мужаас хөөргөсөн туршилтын нислэг мөн л ижил шалтгаанаар бүтэлгүйтсэн байна.
SpaceX компанийн зүгээс туршилтын дата мэдээллийг сайтар судалж, алдааны гол учир шалтгааныг олох болно гэдгээ мэдэгдсэн юм. Харин АНУ-ын Холбооны агаарын тээврийн албаны зүгээс тус компанийг ахин пуужингийн туршилт явуулахаасаа өмнө өмнөх дэлбэрэлтүүдийг сайтар шалгах хэрэгтэй гэсэн байна. NASA мөн саран дээр ахин хүн буулгах Артемис төслийнхөө хүрээнд SpaceX компанийн Starship хөлгийн өөрчилсөн хувилбарыг ашиглах найдлага тавьж байгаа билээ.
Элон Маскын хувьд ч Starship хөлгөөр эхлээд саран дээр хүн буулгаж, дараа нь Ангараг гараг дээр хүн буулгаснаар хүн төрөлхтнийг “олон гараг эзэмшигч” болгох том зорилготой бөгөөд Ангараг руу хийх аяллын талаар 2016 оноос эхлэн ярьсаар байгаа юм.
Элон Маск ирэх оны сүүлээр Ангараг руу хийх сансрын аялалд Tesla компанийн “Optimus” роботыг илгээнэ гэдгээ мөн мэдэгдсэн байна. Өнгөрсөн жил олон нийтэд танилцуулсан Optimus робот 20-30 мянган ам.долларын үнэтэй худалдаанд гарахаар төлөвлөгдөж байгаа гэнэ.
Өнгөрсөн баасан гарагт Элон Маскийн SpaceX компанийн Falcon 9 пуужингаар Олон улсын сансрын станцид очиж ажиллах дараагийн ээлжийн сансрын нисгэгчдийг хөөргөөд байгаагаас гадна мөн анх Олон улсын сансрын станцид ердөө 8-хан өдөр ажиллахаар очсон ч техникийн асуудлаас үүдэн тус станцид 9 сарыг өнгөрүүлсэн Бутч Уилмор, Суни Уилльямс нарыг эргүүлэн авчрах бөгөөд тэднийг өнөөдөр эх дэлхийдээ буцаж ирнэ гэдгийг олон улсын хэвлэл мэдээллийн хэрэгслүүд мэдээлж байна.