Талийгаач Ким Сэ Роны гэр бүлийнхэн YouTuber И Жин Хо, жүжигчин Ким Сү Хён нарын эсрэг хэвлэлийн бага хурал хийх үеэр улс төрийн агуулга бүхий уриа лоозонтой байсан нь олон нийт болон сэтгүүлчдийн дунд хардлага төрүүллээ.Гуравдугаар сарын 17-нд Ким Сэ Роны гэр бүлийн хууль ёсны төлөөлөгч, “Bu You ” хуулийн фирмийн хуульч Бу Жи Сок, Солонгосын алдартнуудын амиа хорлолтоос урьдчилан сэргийлэх нийгэмлэгийн захирал Квон Янг Чан, “Гаросеро” судалгааны хүрээлэнгийн гүйцэтгэх захирал Ким Се Уй нарын хамт Сөүл хотын цагдаагийн газрын өмнө хэвлэлийнхэнд нээлттэй мэдээлэл хийсэн юм. Энэ үеэр Ким Се Уй толгойндоо “Импичментийн эсрэг” гэсэн уриа бүхий улаан тууз зүүсэн байв.

Энэхүү хэвлэлийн хурал нь Ким Сэ Роны гэр бүлийн гомдол, хууль ёсны нэхэмжлэлд анхаарлаа хандуулах зорилготой байсан ч улс төрийн агуулгатай мессеж нь сэтгүүлчдийн дунд эргэлзээ төрүүлжээ. Хэвлэлийн бага хурлыг улс төрийн үйл явдал гэж буруу тайлбарлахгүйн тулд зарим хэвлэл мэдээллийн хэрэгслээр толгойн туузыг бүдгэрүүлэх эсвэл Ким Се Уйгийн зургийг бүхэлд нь хассан байна. Хэргийн газар байсан нэгэн гэрэл зурагчин “Үйл явдлын мөн чанарыг харгалзан бид улс төрийн үл ойлголцол гарахгүйн тулд “Импичментийн эсрэг” уриаг бүдгэрүүлэхээр шийдсэн” гэж тайлбарлажээ.