Хонг Конгийн олон улсын кино, телевизийн 29 дэх үзэсгэлэн даваа гарагт буюу өчигдөр нээлтээ хийлээ. Уг наадамд 34 улс орон, бүс нутгийн 760 гаруй оролцогчид оролцож байгаа бөгөөд зөвхөн олон улсад үйл ажиллагаа явуулдаг томоохон дистрибьютер компаниудыг шалгаруулан оролцуулдаг.

 Хонг Конгт зохион байгуулагддаг томоохон арга хэмжээний нэгт зүй ёсоор багтдаг уг үзэсгэлэнд Камбож, Франц, Энэтхэг улсын павильонууд нээгдсэнээс гадна АСЕАН-ы орнуудаас 100 гаруй оролцогчид ирж оролцож байна. Түүнчлэн Tencent, iQIYI болон Хятадын эх газрын бусад зарим стриминг платформууд ч өөрсдийн шинэ төслөө уг үзэсгэлэнгийн үеэр танилцуулах юм.

Зөвхөн Гуандун мужаас нийт 58 компани оролцож 100 гаруй бүтээгдэхүүнээ дэлгэж байгаа гээд бодохоор кино бүтээгчдийн хувьд хир том үзэсгэлэн болохыг мэдэж болно.

Хонгконгийн кино маркет энэ удаа хиймэл оюун ухаан, түүнийг ашиглаж бүтээх виртуал эффект, дүр төрх, дуу хоолойг давтагдашгүй байдлаар бүтээж байгаа технологид ач холбогдол өгч байгаагаараа онцлогтой. Үзэсгэлэн 4 хоног үргэлжлэх гэнэ.