Ноорог.мн саитын залуус цахим мөрийтэй тоглоом зохион байгуулж, дансаараа 9.3 тэрбум төгрөгийн гүйлгээ хийсэн, хүнийг амиа хорлоход хүргэсэн гэмт хэрэгт аль өнгөрсөн оноос хойш шалгагдаж байгаа гэх маш ноцтой мэдээллийг Хууль зүй, дотоод хэргийн сайд О.Алтангэрэл өгөв. Үүнийг тус саитыг үүсгэн байгуулагч О.Уламсайхан үгүйсгэсэн байна. Тэрээр цахим хуудсандаа “9.3 тэрбум төгрөг олдог, мөрийтэй тоглоом зохион байгуулдаг гэх зэргээр салбарын сайдын ярьж байгаа зүйлсийг анх удаа сонслоо. Хэрвээ тийм мөнгө олдог, эсвэл MCS -ээс тийм хэмжээний санхүүжилт авдаг байсан бол сая 15-ны цалингаа хугацаанд нь тавих байсан” хэмээн бичжээ.
Хууль зүй, дотоод хэргийн сайдын “Хэлсэн үгийнхээ төлөө хариуцлага хүлээнэ” хэмээн тодотгож байж хэлсэн үгийг Ноорог.мн саитын үүсгэн байгуулагч О.Уламсайхан үндэслэлгүй гэж мэдэгдлээ. Саитынхаа компьютер, гар утас зэргээ цагдаагийнханд хураалгасан учраас цаашид хувийн сошиал хаягаараа байр сууриа илэрхийлсээр байна гэдгээ тэрээр зарлажээ.