2025 оны 3 дугаар сарын 20-ны 08:00 цагийн орчимд “Зорчигч тээвэр хоёр” ОНӨААТҮГ-ын 3-р хэсгийн жолооч Д.Азжаргал Ч:28 чиглэлийн (Сэлх-7 буудал) автобусаар нийтийн тээврийн үйлчилгээнд явж байхдаа Сэлхийн 3 дугаар буудлын зүүн талд байрлах нэгэн айлын амбаараас утаа гарч буйг анзаарчээ. Тэр даруй тээврийн хэрэгслээ зогсоон, гүйж очиход, хашааны хаалга цоожтой, нэг залуу гадаа нь зогсож байсан аж. Тэр аль хэдийнэ галын дуудлага өгсөн байжээ.

Д.Азжаргал нөхцөл байдлыг ойлгон, хөрш айлынх нь хаалгыг нүдэн “Хажуугийн айлд чинь хүн байгаа юу?” гэж асуухад дотроос “Хүнтэй” гэж хариулжээ. Тэр даруй хашаа давж, байшингийн цонхыг хагалан орж, унтаж байсан 30 орчим насны залууг сэрээж амжсан байна. Улмаар 9-10 насны хүүг хамт орсон залуутайгаа хамт өргөн гаргаж, угаартах, галд өртөх аюулаас аварчээ.