Өнөөдөр дэлхийн аз жаргалын өдөр. Тэгвэл 2024 оны “Дэлхийн аз жаргалын индекс” -ээр Монгол Улс 143 орноос 77 дугаарт жагссан байна. Сарын өмнө гарсан энэ үзүүлэлтээр манай улс өмнөх оныхоосоо 16 байр ухарчээ. 2023 онд Монгол улс тус индексээр 61 дүгээрт жагсаж байсан юм. Аз жаргалын индекс нь улс орнуудын иргэд амьдралдаа сэтгэл ханамжтай байгаа эсэхийг 1 хүнд ногдох ДНБ, нийгмийн халамж, дундаж наслалт, эрх чөлөөний үнэлэмж, өглөгч чанар, авлигын түвшин зэрэг үзүүлэлтүүдээр үнэлдэг байна. Түүнчлэн тухайн улс орны дундаж давхаргын тоо хэмжээг үндэслэдэг.
Дэлхийн аз жаргалын индексээр 7 жил дараалан тэргүүлж буй улс бол Финланд. Харин дараагийн аз жаргалтай иргэдтэй улсаар Дани жагсаж байна. Хамгийн хачирхалтай нь дээрх 2 орны иргэдэд ирдэг татварын хэмжээ тун өндөр гэнэ. Финландынх хувь хүний орлогын татвар 51 хувь бол Дани улсын иргэд хувь хүний орлогын татварт 55-60 хувийг төлдөг байна.
2024 онд БНХАУ аз жаргалын индексээр 143 орноос 60 дугаарт бичигджээ.
Өнгөрсөн онд АНУ-ын хувьд аз жаргалын индексээр 23 дугаарт жагсжээ. Энэ нь 2023 оныхоос найман байр ухарсан үзүүлэлт юм.